Që nga fillimi i aventurës së tij në stolin kuqezi, shumë gjëra kanë ndryshuar. Në Paris, Stefano Pioli do të arrijë në kuotën e 200 ndeshjeve me Milanin. Një arritje prestigjioze, që forcon pozitën e trajnerit në historinë e “Djallit”. Vetëm 6 trajnerë të mëparshëm, deri më tani, kanë bërë më mirë se ai: nga Nereo Rocco tek Arrigo Sacchi, duke kaluar nga Carlo Ancelotti dhe Fabio Capello.
I zgjedhur në vend të Giampaolo në tetor 2019, ardhja e tij në Milanello u mirëprit me një “#Pioliout”, i cili shpejt u bë trend në mediat sociale. Në Milano, Pioli duhej të ishte thjesht një trajner i përkohshëm, më pas t’ia kalonte stafetën Rangnick, zëvendësuesit të caktuar për revolucionin.
Fillimi nuk ishte më i thjeshti. Pas disa shenjave pozitive, humbja 5-0 kundër Atalantës në dhjetor ilustroi momentin e errët të një skuadre, me 7 pikë larg zonës së rënies dhe 14 pikë nga zona e Champions-it. Pastaj pika e kthesës. Ardhjet e Ibrës dhe Kjaer, ngritja e sezonit të parë, kualifikimi në Champions League, titulli dhe rikthimi i klubit kuqezi ndër 4 më të mirët në Europë.
Sot trajneri po përgatitet të festojë në Paris dhe dhurata që pret nga skuadra e tij është e lehtë të hipotezohet. Me 200 stolat kuqezi, Pioli aktualisht është vetëm pas “përbindëshave” të shenjtë të historisë së Milanit për sa i përket karizmës dhe fitoreve.
Në krye të listës së më të pranishmëve është Nereo Rocco, i cili mes viteve 60-të dhe 70-të rreshtoi 459 ndeshje, duke fituar dy kupat e para evropiane (1962-1963 dhe 1968-1969) dhe dy kampionate (1961-1962 dhe 1967-1968). Pas tij, Carlo Ancelotti, arkitekti i triumfeve të fundit kontinentale më 2003 dhe 2007, me 420 ndeshje.
Podiumin e mbyll Giuseppe Viani, me 376 ndeshje në stolin kuqezi, duke kryesuar së bashku me Rocco në triumfe të mëdha. Pastaj Fabio Capello, i katërti, me 300 ndeshje (fitues i Ligës së Kampionëve 1994 në Milano dhe 4 kampionate), Nils Liedholm me 280 ndeshje (teknik në sezonin e yjeve, 1978-1979) dhe Arrigo Sacchi me 220 stola, të zbukuruar nga triumfet evropiane 1989 dhe 1990, si dhe trengjyrëshi më 1988, titulli i parë i epokës së Berlusconit./telesport/
