Ilir Daja është shprehur i pakënaqur me lojën e skuadrës së tij pas humbjes ndaj Laçit, duke u shprehur se loja në sulm ishte shumë problem, ndërkohë që prapavija kishte probleme. Për “Supersport” Daja i ka faturuar një pjesë të përgjegjësisë edhe Bushiçit.
“Kemi vuajtur në fazën sulmuese, pasi në mënyrën e lojës që unë dua të luajmë, nuk po funksionon. Alla nuk është ende në 100% dhe kishim disa probleme edhe në prapavijë. Edhe fusha nuk ishte në kushtet e duhura.
Më vjen keq se skuadra fillon të reagojë vetëm pasi të ndëshkohet. Pas pësimit të golit, t’iu them të drejtën nuk është se na rrezikuan shumë. Kundërshtari luajti më shumë në mesfushë dhe rastet e pastra munguan.
Rasti i Jonuzit? Nuk dua të merrem me gjyqtarët, ka qenë një ambient i qetë në Laç dhe kemi luajtur futboll lirisht. Kemi gabuar në goditjet standarde, por ky është futbolli. Do të shohim përpara për të rregulluar këto gabime.
Unë do të thosha se mungesa e përqendrimit në goditje standarde në ka penalizuar. Nëse nuk jemi të përqendruar dhe nëse lojtarët nuk kanë dëshirë për të fituar dyluftimin në ajër, ndëshkohemi.
I kemi studiuar këto gjëra dhe kemi bërë shumë stërvitje sa i takon goditjeve standarde, por ka ende punë për të bërë.
Duke iu referuar ndeshjes së sotme edhe Veliaj, edhe Pollozhani po sakrifikojnë, pasi nuk janë qendërmbrojtës. Po i përdor aty për shkak të mungesave. Pollozhani ka bërë mirë kudo që ka luajtur.
Bushiç nuk është sulmuesi ideal për lojën që ne duam të bëjmë. Gjithsesi do të mundohemi të përmirësojmë të gjitha gabimet që kemi bërë sot, por edhe në ndeshjet e kaluara”, përfundoi Daja. /Vipsport/
