Periudha e verës po shënon shumë ndryshime në rradhët e skuadrave në Shqipëri dhe në Kosovë, ku ato po përgatiten për sezonin e ri me “piketimet” e tyre në merkato. Në futbollin kosovar, gjysmën e dytë të sezonit, një ndër ata që spikati më shumë me paraqitjet e tij ishte portieri italian Davide Borsellini, që e mbylli vitin si pjesë e Fushë-Kosovës në Superligë.
Tashmë, me rënien e kësaj skuadre një kategori më poshtë, portieri është në kërkim të një ekipi të ri për të ardhmen e tij. Borsellini po studion ofertat që kanë ardhur në drejtim të tij gjatë kësaj periudhe dhe në fakt, nga sa mësohet nga burime të “Shkodra Sport”, ato nuk kanë qenë të pakta, pasi interes për të kanë shfaqur katër ekipe të Superligës së Kosovës, duke marrë parasysh edhe paraqitjet pozitive që bëri në gjysmën e dytë të këtij sezoni.
Nga sa mësohet nga burime të “Shkodra Sport”, për Borsellinin kanë shfaqur interes Malisheva, Prishtina, Ferronikeli dhe Suhareka e sapongjitur. Bisedimet kanë qenë konkrete mes palëve, ku klubet kanë dhënë edhe ofertat e tyre dhe mbetet për t’u parë tashmë në ditët në vijim se cila do të jetë e ardhmja e portierit italian.
Davide Borsellini ka mbajtur në pesë ndeshje me Fushë-Kosovën portën e tij të paprekur, teksa që nga janari 25-vjeçari u kthye në njërin prej futbollistëve më kryesorë në këtë skuadër, ku qëndroi mes shtyllave në 16-ndeshje. Në edicionin 2017-2018, Borsellini ka qenë pjesë e klubit të njohur italian, Udinese, si portier i tretë, teksa për të aventura te Fushë-Kosova ishte e para jashtë Italisë. Gjithsesi, e ardhmja e tij duket se do të vijojë të jetë sërish në Kosovë.
Maringlen ZHIVANI
