Gjatë këtij sezoni ka qenë pjesë e Burrelit por duket se rrugët në mes tij dhe kësaj skuadre tashmë janë ndarë. Bëhet fjalë për portierin shkodran Ardian Hila i cili prej pak ditësh nuk është më pjesë e kësaj skuadre.
Duket se gjërat në kampin matjan nuk po shkojnë ashtu si duhet dhe për këtë arsye, janë të shumtë lojtarët që janë larguar prej aty. Ditët e fundit interesant është fakti se përveç Hilës, nga Burreli është larguar edhe portieri tjetër Selaci.
Ky i fundit sot ka firmosur për ekipin e Kamzës ndërkohë që 20 vjeçari shkodran tashmë është vënë në kërkim të gjetjes së një ekipi tjetër për të vazhduar karrierën e tij.
Paraqitjet e tij në fazën e parë të kampionatit kanë qenë pozitive dhe për këtë arsye, 2-3 ekipe kanë shprehur interes për të. Njëri nga ekipet ku ai mund të vazhdojë karrierën është edhe Besëlidhja, skuadër e cila ka mbetur vetëm me një portier, shkodranin tjetër Bajri dhe kërkon edhe një tjetër.
Kjo do të shtonte konkurrencën në këtë repart. Megjithatë për Hilën ka edhe ekipe të tjera që kanë shpehur interesim megjithatë duhet pritur edhe pak ditë derisa të mësojmë se cila do të jetë e ardhmja e tij.
© shkodrasport.com
