Luan sezonin e tij te pare ne futbollin shqiptar dhe kuptohet qe po mundohet te beje me te miren. Portieri Bojan Zogoviç pas disa pervojave me ekipe te tjera, tashme eshte i fokusuar tek Vllaznia, skuader me te cilen po ben mire dhe premton se do te mundohet te jape me te miren qe ajo te arrije objektivat e saj.
Zogoviç ka pranuar me kenaqesi te flase ekskluzivisht per “Shkodra Sport” me gazetarin Andi Gjurgjej pikerisht ne pragndeshjen me Tiranen, per te cilen thote se Vllaznia do te beje çmos te ruaje te paprekur porten e tij ne menyre qe ekipi te marre nje rezultat pozitiv edhe ne kete ndeshje. Ja intervista e tij per “Shkodra Sport”:
– Së pari, faleminderit që pranuat të flisni për gazetën “Shkodra Sport”…
Unë jam gjithmonë i gatshëm për bisedë.
– Keni disa muaj që ndodheni në Shkodër, si ndiheni në këtë qytet?
Ndihem shumë mirë. Unë jam këtu me familjen time. Njerëzit këtu janë të mirë dhe kemi kaluar këndshëm këtu. Unë u mësova lehtë me qytetin.
– Në këtë fazë të parë të kampionatit keni luajtur në çdo ndeshje në formacionin e parë dhe duket se keni fituar besimin e stafit drejtues. Çfare mendoni për këtë?
Jam i lumtur që luaj te Vllaznia. Jam i lumtur që stafi ka besim tek unë. Ka patur ndeshje të mira dhe të këqija dhe unë e di këtë, por unë përgjithësisht jam i kënaqur dhe do të përpiqem të ndihmoj shokët e mi të skuadrës dhe klubin që të vazhdojnë me rezultate të mira.
– Si e shihni Vllazninë këtë sezon?
Ne kemi një atmosferë të mirë, njerëz dhe lojtarë të shkëlqyeshëm dhe natyrisht një staf të shkëlqyeshëm profesional.
Mendoj se duhet të shkojmë nga ndeshja në ndeshje. Ne do të shohim se si përfundon gjithçka, por unë jam optimist.
Nëse vazhdojmë në këtë ritëm kemi një shans për të bërë një rezultat të mirë këtë vit për Vllazninë dhe Shkodrën.
– Vllaznia ka hasur vështirësi në gjetjen e një portieri cilësor. A mendoni se stafi ka zgjedhjen e duhur me afrimin tuaj në ekip ?
Stafi ka besim tek unë dhe jam i lumtur për këtë. Kam përvojë pas vetes dhe besoj se mund ta ndihmoj klubin. Ky është një kampionat i ri për mua dhe sigurisht që nuk është e lehtë për të luajtur, por ka cilësi. Pozicioni im është sigurisht mjaft i përgjegjshëm dhe është e rëndësishme që ekipi të ketë besim tek unë. Besoj se mund ta ndihmoj klubin dhe lojtarët në qëllimet tona.
– Cilat janë marrëdhëniet tuaja me shokët e ekipit? Po me trajnerin?
Më duhet të them që kam vërtet marrëdhënie të shkëlqyera me shokët e skuadrës dhe trajnerin. Këtu në ekip kemi djem dhe atmosferë të shkëlqyer. Trajnerët po bëjnë një punë të shkëlqyer.
– Sot do luani ndeshjen klasike të futbollit shqiptar kundër Tiranës në transfertë. A premton se katërkëndëshi juaj do të mbetet i paprekur dhe a besoni në një rezultat pozitiv ?
Po, sot do luajmë derbin me Tiranën. Kemi arritur dy fitore radhazi dhe do të përpiqemi ta mbyllim me një rezultat pozitiv. Ne e respektojmë çdo skuadër, por deri më tani kemi treguar se mund të luajmë me të gjithë dhe sigurisht që do të shkojmë për një rezultat pozitiv. Besoj se do të jem në gjendje ta ruaj të paprekur portën.
– Faleminderit për intervistën. Shpresoj të kontaktohemi sërish…
Faleminderit. Unë do jem gjithmonë i gatshëm për të folur.
Intervistoi: Andi GJURGJEJ
