Edhe pse kanë kaluar pak javë, nga shkarkimi i Mirel Josës si trajneri i Vllaznisë dhe emërimi në krye të kuqebluve të shkodranit Rudi Vata, përsëri në qarqe të ndryshme ka diskutime, apo dalin fakte të reja çdo ditë nga kandidaturat, që ishin në atë kohë, për të pasuar teknikun tiranas në krye të shkodranëve. Dihet tashmë, se menjëherë pas humbjes së Vllaznisë në Vlorë, 1-0, përballë Flamurtarit, erdhi dhe shkarkimi i Mirel Josës. Në fakt përpara se të zhvillohej kjo ndeshje, ishin marrë masat nga drejtuesit e klubit të futbollit “Vllaznia sh.a.”, që nëse nuk fitohej ky takim nga shkodranët, tekniku Josa të shkarkohej, sidomos nëse do të humbej, siç edhe ndodhi.
Kjo vërtetohet nga fakti, që dy orë përpara takimit Flamutari-Vllaznia 1-0, ish-trajneri i ekipit tonë “Shpresa”, Artan Bushati është telefonuar nga krerët e kësaj skuadre, duke i bërë direkt ofertën, nëse ai ishte i gatshëm apo jo, për të marrë drejtimin e Vllaznisë, pas kësaj ndeshjeje, gjithnjë, nëse nuk fitohej. Mësohet se Bushati e ka refuzuar menjëherë ofertën e kuqebluve, për aryse, që nuk dihen, por në të njëjtën kohë, i ka telefonuar Josës, përpara ndeshjes me vlonjatët, duke ia bërë të qartë, se nëse nuk fiton, do të shkarkohej, duke i treguar edhe “skenarin” e drejtuesve të klubit për këtë çështje, e duke e vënë në dijeni ish-trajnerin e Vllaznisë. Nëse Artan Bushati refuzoi vetë Vllazninë, kjo e fundit refuzoi një tjetër teknik tiranas për të pasuar Mirel Josën në krye të këtij ekipi. Bëhet fjalë për Shkëlqim Muçën, ku menaxheri i tij ka mbërritur dy herë në Shkodër, brenda 48 orëve, duke u bërë të qartë ofertën e “klientit” të tij. Mësohet se Shkëlqim Muça, që nga momenti që është shkarkuar Mirel Josa, e deri në fund të sezonit, ka kërkuar 30 mijë euro, me kusht, që Vllaznia të jetë e sigurtë, minimalisht, në Kupat e Europës. Por edhe këtë 30 mijë euro, ai e ka kërkuar përsëri me kusht, që nëse nuk arrin objektivin e kuqebluve në fund të sezonit, t’i ndalej 30 % e kësaj shume, në formë gjobe. Por në çastet e fundit Shkëlqim Muça është refuzuar nga drejtuesit e Bashkisë së Shkodrës dhe ata të klubit të futbollit “Vllaznia sh.a.”, duke ia besuar “timonin” shkodranit Rudi Vata, që deri tani, në dy ndeshje në krye të kuqebluve, ka marrë 4 pikë.
Mejdan Zhivani
