Thuajse çdo vit është gjendur në vështirësi me Adën por ia ka dalë ta shpëtojë. Askush nuk di të thotë si ia arrin. Pa ndonjë mbështetje financiare, pa emra të bujshëm në skuadër megjithatë Ada gjithnjë ka arritur të sigurojë mbijetesën madje në shumë sezone duke u renditur në pozita komode. Sezoni aktual megjithatë ka nisur keq. Katër ndeshje, katër humbje e kjo ecuri detyroi edhe trajnerin Besnik Duli të jepte dorëheqjen pas ndeshjes së fundit me Mamurrasin.
Kjo situatë krijoi përshtypjen në fillim se do të bënte që gjërat të precipitonin edhe më keq por nuk ka ndodhur kështu. Velipojakët duket se kanë qenë me fat sepse pikërisht këto ditë, trajneri Kreshnik Krepi dha dorëheqjen nga Veleçiku dhe pranoi ofertën për të marrë drejtimin e Adës. Edhe vetë presidenti Pjetri e konsideron fat këtë gjë kur thotë: “Situata nuk ishte e mirë në skuadër. Ndoshta ngaqë nuk po shihte ndryshim edhe trajneri i mëparshëm Duli dha dorëheqjen pavarësisht se mungesa e rezultateve nuk ishte faji i tij. Por nga ana tjetër, ardhja e trajnerit Krepi them se ka rregulluar shumë gjëra në skuadër. Ai i njeh shumë prej lojtarëve, ka rritur motivimin e tyre në stërvitje dhe sëbashku mendoj se do bëjmë gjëra të mira në ndeshjet e ardhshme”. Vështirësitë për Adën megjithatë janë të mëdha. Kryesorja është ajo e mungesës së fushës, çka e ka detyruar këtë ekip t’i zhvillojë ndeshjet në Pukë. Përveç kësaj, një problem i madh është edhe mosmbështetja nga ana e Komunës Velipojë e cila ndonëse është një nga komunat me të ardhurat më të mëdha në vend, nuk ka dhënë asnjë lekë për ekipin e futbollit. Edhe një fond prej 20 milionë lekësh të vjetra miratuar nga Këshilli i Komunës në fillim të vitit, nuk lëvrohet e kjo gjë e vuri në dyshim edhe pjesmarrjen e ekipit në kampionat. Këto vështirësi i përmend edhe presidenti Pjetri duke thënë: “Shorti i këyre javëve të para ka qenë shumë i vështirë. Pastaj, e filluam kampionatin me shumë probleme sepse deri në fund ishim në dyshime nëse do merrnim pjesë në kampionat apo jo. Komuna Velipojë vazhdon të jetë shumë indiferente ndaj këtij ekipi dhe kjo është diçka absurde. Por unë jam mësuar me vështirësi të tilla dhe ju premtoj se sërish Ada edhe sivjet do shpëtojë. Ajo nuk do të bjerë nga kategoria”. Një guxim i tepruar ndoshta duke parë atë se në renditje është në kuotën e zero pikëve megjithatë ka besim. Ashtu si dhe trajneri Krepi dhe për këtë arsye do kërkohet marrja e pikëve që në ndeshjen e rradhës, atë që do të luhet të shtunën në Pukë, pikërisht ndaj Veleçikut. Për këtë takim, presidenti Pjetri është i bindur se skuadra e tij do të marrë pikë. “Ndeshja është shumë e vështirë por do mundohemi t’ia dalim. Besoj se diçka ka për të ndryshuar në skuadrën tonë për të kërkuar të paktën një barazim por pse jo edhe fitoren”- ka thënë presidenti i Adës Alfred Pjetri.
Gjergj KOLA
