Kur dukej se gjithçka do të shkonte mirë në përgatitjet për ndeshjen e kësaj jave ndaj Teutës, në fakt ka ndodhur diçka që ka prishur jo pak planet e trajnerit Gjoka.
Arsyeja është gjendja gripale që ka pllakosur gjithë vendin dhe është shfaqur edhe tek futbollistët shkodranë.
Dy prej tyre, sot nuk janë stërvitur me grupin. Bëhet fjalë për kapitenin Gilman Lika dhe mesfushorin tjetër, Florind Bardullën.
Ky i fundit madje nuk ka qenë i pranishëm në stërvitje sot pasi është në regjim shtrati ndërsa kapiteni ka qenë aty por nuk është stërvitur.
Madje, siç bëhet e ditur, edhe në Lushnjë ai ka luajtur por ka sakrifikuar jo pak duke qenë në fushë ndonëse me temperaturë.
Gjendja e tyre do të shihet ditët e ardhshme për të parë nëse do jenë të gatshëm për të luajtur apo jo ndaj Teutës.
© shkodrasport.com
