Vetem dy javë pas prishjes së kontratVoska Sports me Vllazninë, sulmuesi nga Shkupi Bujar Hajdari është zyrtarizuar sot tek skuadra e tij e re, Voska Sport. Në fakt 21 vjeçari ka qenë në kontakte edhe me ekipin kosovar të Malishevës, por në fund zgjodhi skuadrën e vendit të tij.
Drejtuesit e Voska Sport kanë nënshkruar kontratë një vjeçare me këtë futbollist, i cili te skuadra shqiptare nga Ohri vjen si futbollistë i lirë, pasi prishi kontratën me Vllazninë vetëm pas disa javëve.
Hajdari erdhi si një element shumë premtues te Vllaznia dhe fillimisht drejtuesit kishin shumë besim tek aftësitë e tij,madje ai debutoi me fanellën kuqeblu edhe në Kupat e Europës, por më pas rrugët u ndanë sepse stafi teknik mbeti i pakënaqur nga lojtari dhe pritshmëritë që kishin për të, raporton shkodrasport.com.
Megjithatë kjo nuk do të thotë se skuadrat e tjera nuk e pëlqejnë dhe fakt është që ditën e sotme sulmuesi shtatëlartë është prezantuar tek skuadra e tij e re.
Kujtojmë, Hajdari është prodhim i shkollës së futbollit të Rabotniçkit, me të cilën skuadër edhe kishte debutuar në Ligën e Parë, ndërsa më pas veshi edhe fanellën e Skopjes, me të cilën skuadër edicionin e kaluar në Ligën e Parë, luajti në 27 ndeshje, duke realizuar 6 gola./SHKODRA-SPORT.COM/
