Sulmuesi i Shpresave të Shqipërisë, Din Sula ishte protagonist në këtë javë në kampionatin belg teksa aktivizohet me skuadrën e Vasland Beveren. Ekipi i tij ishte duke u mposhtur nga skuadra prestigjioze e Standard Liezh, mirëpo 21-vjeçari iu dhuroi suksesin të tijve.
Sula nuk u aktivizua si titullar por u inkuadrua në lojë në minutën e 65, megjithatë kjo nuk e pengoi futbollistin të realizonte golin deçiziv në minutën e 88.
Pas ndeshjes, Sula pranoi se trajneri bëri mirë që e aktivizoi dhe se në fushë u furnizua me shumë topa nga shokët e skuadrës dhe në këtë formë erdhi goli i fitores. “ Këtë javë isha pak i sëmurë dhe po kështu ishte edhe sulmuesi tjetër. Mbase kjo kishte të bënte me faktin se të dy e nisëm nga stoli.
Trajneri bëri një lëvizje të zgjuar që na aktivizoj. U furnizuam me shumë topa të dobishëm në zonë dhe ndoshta kjo kishte ndodhur më rrallë në të kaluarën.
E di që kam kualitetin për të shënuar por na ka munguar edhe fati në këtë sezon. Shpresoj që në të ardhmen të shënoj me vazhdimësi”, u shpreh Sula. Ky ishte goli i dytë në kampionat për lojtarin e Shpresave ndërsa falë kësaj fitoreje të ardhur nga këmbët e Sulës, Vasland Beveren u ngjit në vendin e parafundit. /vipsport/
