Drejtori i Përgjithshëm i Radio Televizionit Publik Shqiptar, Alfred Peza ka dhënë shpjegimin se përse RTSH nuk po e transmeton Kampionatin Europian të Futbollit, “Euro2024”.
Në raportimin në Komisionin e Medias dhe Edukimit, Peza tha se RTSH ka bërë një ofertë të mirë dhe konkurruese, por nuk e fituan dot, pasi të tjerë kishin dhënë ofertë më të lartë. Ishte deputeti i PD, Lefter Gështenja që e pyeti Pezën se përse nuk transmeton ndeshjet e evropianit, duke e cilësuar të turpshme.
“Është e turpshme që qytetarët shqiptarë nuk mund të shohin kombëtaren e tyre në televizionin Publik RTSH, për të cilin paguajnë taksa, por ia keni shitur një privati. Ndërsa vetë shpenzoni mijëra euro për ta parë ndeshjen në Gjermani”, tha Gështenja.
“Është një e drejtë për të cilën konkurrohet në treg dhe fiton ai që jep ofertën më të lartë. Kemi dhënë një ofertë shumë të mirë dhe konkurruese.
Ka pasur një shtyrje prej disa javësh të përgjigjes, e sigurisht që e ka fituar ai që ka paguar më shumë. Sa i përket transmetimit “free”, e drejta e transmetimit është e drejta e transmetimit me paketa dhe me free. Ata që e kanë blerë janë të detyruar që ta japin “free”, shprehet Peza.
Të drejtën për transmetimin e Kampionatit Europian të Futbollit, “Euro2024” e ka televizioni Klan.
