Mund të duket një lajm disi i habitshëm por është mëse i vërtetë. Në palestrën e taekondosë së ekipit të Vllaznisë aktualisht stërviten plot 80 të rinj dhe të reja! Diçka e çuditshme sepse kemi të bëjmë me një sport të rinj por që duket se i ka bërë për vete të rinjtë shkodranë. Një gjë të tillë e konfirmon për gazetën “Shkodra Sport” trajneri Elion Puka që shprehet: “Sot aktualisht në palestër kemi plot 80 sportistë. Një numër shumë i kënaqshëm padyshim.
Taekondoja është kthyer në një sport “trendy” për rininë dhe jo vetëm tek djemtë por edhe tek vajzat. Madje mund t’u them se sportisja Dea Tërbuni ka cilësi të rradha dhe nëse do të mbështetej nga ana financiare, nuk do ishte çudi që ajo të ishte pjesmarrës edhe në Lojërat Olimpike sepse siç dihet, nga artet marciale, xhudoja dhe taekondoja janë sporte olimpike. Me këto sportistë kemi marrë pjesë në shtatë aktivitete kombëtare që janë zhvilluar këtë vit në Shqipëri por edhe në disa aktivitete ndërkombëtare dhe duhet thënë se deri më tani, nuk kemi patur asnjë mbështetje nga asnjë institucion. Thjesht e bëjmë për pasion por pasioni e ka një majë dhe pas tij, nuk mund të vazhdosh prandaj mbesim me shpresën se dikush do të kujtohet për ne”.
© shkodrasport.com
