Raineri: Ju rrëfej 5 muajt më të mirë të jetës time si trajner

Situata rreth tij nuk ka qenë shumë e mirë. fillimisht probleme me ish- administratorin, më pas është sulmuar si i paaftë nga ish- presidenti, jo pak probleme ka patur edhe me ish- zëvendëspresidentin dhe sikur të mos mjaftonin këto, erdhën edhe 6 humbjet rradhazi. Por Baldo Raineri ia ka dalë të triumfojë mbi të gjithë. Jo me peshën trupore por me punën e tij duke i bindur të gjithë. Sot pas pak më tepër se 5 muajsh punë tek Vllaznia, ai bën një bilanc të asaj çfarë ka arritur.

Por edhe asaj çfarë ende nuk ka bërë. Nga Lugano ku ndodhet për pushime pranë familjes së tij, trajneri i skuadrës shkodrane përmes linjës telefonike ka pranuar të intervistohet nga “Sport Plus” dhe të flasë për shumë gjëra. Ja intervista e plotë me të:
-Mister, si kanë qenë këto 5 muaj punë për ju në Shkodër?
-Janë 5 muajt më të mirë të jetës time në këtë profesion. Me gjithë vështirësitë që kemi patur në punën tonë, kemi ndjerë emocione të mëdha. Jam gjendur shumë mirë tek kjo skuadër, tek ai qytet si Shkodra ku njerëzit e duan marrëzisht këtë lojë magjike dhe kur të vijë momenti për t’u larguar, besoj se do jetë shumë e vështirë për mua. Jam mësuar me tifozët e mrekullueshëm të Vllaznisë të cilët më kanë inkurajuar në çdo moment, si në ndeshje ashtu edhe në stërvitje ashtu edhe në kontaktet që kisha çdo ditë me to nëpër rrugët e qytetit. Kjo përvojë e imja në Shqipëri do të më shoqërojë deri në fund të jetës time.
-Nëse do mund të ktheheshim 5 muaj prapa në kohë, duke parë edhe gjithë problematikën që ju ka shoqëruar tek Vllaznia, do t’i thonit sërish “po” ofertës për të ardhur e drejtuar atë?
-E përmenda pak më lart se këto janë 5 muajt më të mirë të jetës time në këtë profesion dhe kuptohet që pyetja juaj nuk merr shumë vlerë në këtë rast. Kjo është eksperienca më e mirë e jetës time dhe po e shijoj atë. Nuk dua të merrem me fjalë “sikur”, “nëse”. Për mua, çdo gjë është pozitive paravërsisht pengesave që kemi kaluar.
-Cili ka qenë momenti më i mirë për ju gjatë drejtimit të kësaj skuadre?
-Momentet e bukura kanë qenë të shumta. Madje edhe kur kemi kaluar në vështirësi, sërish ka patur momente të bukura sepse shikoja që grupi ishte i bashkuar dhe funksiononte. Kjo më kënaqte pa masë dhe më jepet besim për të ardhmen. Për të kaluar pastaj tek momenti tjetër, të cilin e kujtoj me shumë dashuri. Atë kur Grima mori rolin e duhur në klub. Ai na riktheu diellin dhe gëzimin dhe gjërat më pas shkuan mirë për të gjithë ne.
-Po momenti më i keq cili ka qenë?
-I kam lënë prapa këto momente të këqija dhe madje as nuk dua t’i kujtoj. Kuptohet që javët e para me dyshen Nava- Grabova situata nuk ka qenë shumë e mirë por unë ish- presidentit për diçka më duhet t’ia di për nder: që më dha shansin të drejtoj Vllazninë dhe të “zbuloj” Shqipërinë. Për të tjerat nuk kam dashur t’ia di për të sepse ai nuk ka qenë më punëdhënësi im. E kuptova shpejt se kush dhe çfarë synimesh kishin dhe për fat të mirë “u divorcova” shpejt me to.
-Por ke thënë se kur të kthehesh në Zvicër, do të takonit Navën dhe do t’i zgjidhnit privatisht disa probleme që keni patur me të. Tashmë që jeni atje, e keni takuar atë?
-No coment. Zotëria në fjalë më duket se ka disa probleme të tjera dhe nuk jam marrë fare me të.
-Cili ka qenë lojtari që ju ka befasuar me shumë me paraqitjet e tij tek Vllaznia?
-Nuk kam dëshirë të jap emra. Janë të gjithë të mirë. E them këtë duke iu rikthyer edhe njëherë asaj që thashë më lart. Pavarësisht vështirësive që kaluam, pavarësisht nëse ishin paguar apo jo, pavarësisht se kush ishte presidenti, këta futbollistë asnjëherë nuk më thanë se nuk duan të stërviten apo nuk duan të luajnë. Unë i falenderoj për këtë sepse kanë bërë më të mirën e tyre për këtë skuadër duke dhënë një rendiment të lartë në fushë. Kuptohet që kur ke në dispozicion dy formacione, vetëm njëri do luajë dhe tjetri do jetë i gatshëm. E rëndësishme është që secili të japë më të mirën kur t’ia kërkojë trajneri dhe këtë gjë ata e kanë bërë në mënyrën më të mirë të mundshme.
-Pra, nuk dëshironi të evidentoni asnjërin?
-Meqë po ngulni këmbë, po ju them njërin: portierin Selimaj. Nga një i panjohur, që nuk kishte luajtur asnjëherë në nivele të larta, arriti të shfaqet si protagonist në shumicën e ndeshjeve madje edhe duke marrë përgëzimit e trajnerit të portierëve të kombëtares shqiptare.
– Po lojtari që ju ka zhgënjyer më shumë?
-Nuk dua të merrem me fjalën zhgënjim. Ka patur disa lojtarë, kryesisht nga ata të ardhurit, tek të cilët besoja se mund të mbështetesha më shumë, por nuk më bindën dhe për rrjedhojë na zhgënjyen të gjithë.
-A mund të na e shpjegoni situatën e Krujës. Si ka mundësi që ai të përfundojë në stol?
-Kur erdha tek Vllaznia, kuptohet që mësova edhe për karakteristikat e çdo futbollisti dhe të dhënat e tij. Më thanë se Kruja vjet kishte qenë një nga më të mirët. Në këtë kontekst, dëshiroja të bazohesha tek ky futbollist por në fakt, ai gjatë kësaj periudhe nuk ka kaluar momente të mira. Vetëm në dy ndeshjet e fundit nuk ka qenë titullar edhe sepse nuk është ndjerë mirë por unë besoj tek ky futbollist.
-Që do të thotë…?
-Kam vënë një bast me veten, për ta rikthyer këtë lojtar në ato nivele që ka qenë më përpara. Jam i bindur se ka për të ndodhur kjo. Kemi edhe 18 ndeshje të tjera përpara dhe ju siguroj se kam për ta fituar këtë bast. Kruja do luajë sërish madje do ta ndihmojë shumë Vllazninë në gjysmën e dytë të sezonit.
-Flitet se ai mund të largohet drejt Tiranës…
-Do ishte një gabim ta lejonin të largohej. Ai është vetëm 21 vjeç dhe klubi lojtarë të tillë duhet t’i mbajë afër. Besoj se ai do të jetë sërish pjesë e Vllaznisë sepse ka për t’i dhënë shumë kësaj skuadre.
-Ndërkohë Vllaznia ka firmosur me tre 18 vjeçarë, Krymin, Çinarin dhe Hakajn. Një skuadër e perspektivës kjo?
-Siç mund ta keni vërejtur gjatë këtyre 5 muajve që unë drejtoj Vllazninë, nuk i kam dhënë asnjëherë prioritet lojtarëve të huaj të ardhur nga merkatoja. Gjithnjë kam besuar dhe kam dëshiruar t’u jap shansin djemve të rinj shkodranë dhe në këtë mënyrë jam në të njëjtën linjë me klubin, për të ndërtuar një skuadër të perspektivës. Kjo është një ide e mirë. Kur nuk i ke paratë e duhura për të ndërtuar një ekip pretendent, duhet të vazhdojë të punojë me të rinjtë sepse ata kanë entuziasëm dhe dëshirë dhe me këto virtyte, mund të shkohet përpara. Unë këtë gjë kam dashur të bëj disa vite më parë edhe kur drejtoja Bellinzonën në Zvicër. Besoj shumë tek të rinjtë se ato janë e ardhmja.
-Do të ketë nevojë Vllaznia për ndërhyrje në merkato?
– E kam thënë se me merkaton merret Grima. Ai e di cilat janë mundësitë e klubit dhe ku duhet ndërhyrë. Por nëse doni mendimin tim, nuk duhet të prishim ekuilibrat që kemi krijuar deri tani në skuadër. Megjithatë detyra ime është të punoj e të stërvis ekipin.
-Flitet se do vijnë 2-3 uruguajanë për provë. Sa të vlefshëm mund të jenë ato apo mund të kenë fatin e bashkëkombasit të tyre, Aguirre?
-Ndonjë lojtar që mund të vijë, do ta provojmë. Madje me shumë kujdes. Ne i kemi lojtarët e rinj shumë të mirë. Duam lojtarë pak më të mirë sesa këto që kemi. Nëse nuk i kanë këto veçori, natyrisht që nuk do t’i mbajmë. Jam i bindur se testimet do kryhen me shumë seriozitet.
-Si e parashikoni gjysmën e dytë të sezonit për Vllazninë?
-E parashikoj shumë më të qetë sesa të parën. Me ardhjen e drejtuesve të rinj të klubit, besoj se janë rregulluar shumë gjëra dhe ne do të punojmë në kushte komode. Pozitiviteti është të punojmë me lojtarët tanë dhe të mendojmë për të arritur objektivat që kemi dhe jam i bindur se do ia dalim.
-Keni thënë se dëshironi të vazhdoni rrugën në kupë por në çerekfinale do të ndesheni me Kukësin. Ka forcë Vllaznia ka kalojë këtë skuadër?
-Kjo është një dëshirë, njëkohësisht edhe një objektiv. E rëndësishme është njëherë të sigurojmë sa më parë objektivin në kampionat dhe mundësisht që në përfundim të fazës së tretë për të qenë të qetë në fund. Sa për përballjet me Kukësin në kupë, shumëkush mund të mendoj se Kukësi ka një ekip më të mirë se ne sepse jo më kot zë vendin e parë edhe në kampionat por ne kemi forcë, dëshirë, sedër, karakter, fanellën më të rëndë dhe emrin e klubit më të njohur dhe duhet t’i shfrytëzojmë këto faktorë për të provuar kalimin e këtij kundërshtari. Unë besoj!
-Gjatë këtyre ditëve të qëndrimit në Zvicër, shokët dhe miqtë tuaj, ju kanë pyetur për Vllazninë dhe Shqipërinë?
-Jashtëzakonisht shumë. Çdo ditë kam me dhjetëra takime me shokë, miq e gazetarë të cilët duan të dinë mbi këtë përvojë timen në Shqipëri. Kam marrë shumë komplimente prej tyre dhe po ashtu, ata janë befasuar kur unë u flisja për gjërat e mira të Shkodrës dhe Shqipërisë. Mbase mund të kenë patur një përshtypje tjetër deri më tani. Kam patur biseda edhe me shqiptarë që jetojnë në Zvicër prej vitesh dhe që ishin tifozë të Tiranës e Partizanit, por më premtuan se tani do të bëjnë tifo edhe për Vllazninë. Kjo besoj se është një gjë e mirë sepse do i rrisë emrin dhe reputacionin edhe në Europë këtij klubi. Kam dhënë intervista edhe në disa televizione e gazeta në Zvicër. Disa miq të mi gazetarë e ndjekin rregullisht ecurinë time dhe të Vllaznisë dhe i pasqyrojnë atje. Kjo besoj se është shumë pozitive.
-Së fundi, meqë jemi në prag të Vitit të Ri, cili do ishte urimi juaj?
-Uroj të gjithë futbollistët, pjestarët e stafit, drejtuesit e klubit dhe në veçanti tifozët e mrekullueshëm shkodranë, Gëzuar Vitin e Ri 2015. Viti që vjen qoftë më i mbarë për të gjithë ne.
Gjergj KOLA

Ulje- ngritjet e Rainerit në këto 5 muaj tek Vllaznia
Erdhi në Shkodër në fund të korrikut me shumë projekte përpara por pa e ditur se ku po shkelte. Pikërisht njerëzit që e kishin sjellë tek Vllaznia, ish- presidenti Nava dhe ish- administratorit Grabova, tentuan menjëherë ta heqin?! Nuk dihet saktësisht se pse por duket se Baldo Raineri nuk u ka shkuar për shtat projekteve të tyre. Largimi i Grabovës, i dha krahë trajnerit që kishte më shumë forcë në skuadër. Por me të filluar kampionati, polemika me Navën la sërish një shije të keqe. Ferrari, liçensa e munguar, Lamborghini dhe akuzat e tjera në adresë të tij, nuk e lëkundën në punën me skuadrën. Përkundrazi, ai e nisi mirë kampionatin dhe mori jo pak pikë. Por largimi i kompanisë “Gea Sport” krijoi jo pak probleme në skuadër dhe kjo u reflektua me pësimin e gjashtë humbjeve rradhazi. Trajneri filloi të shfaqte dukshëm shenja nervozismi, duke kërkuar në njëfarë mënyre llogari pse mediat, tifozët apo dhe drejtuesit kishin filluar ta braktisin. Ai madje paraqiti edhe dorëheqjen pas humbjes me Teutën në Shkodër Në këto momente del në skenë Armir Grima, drejtori sportiv i klubit. Ai aty kishte qenë, por i mënjanuar nga kompania që drejtonte klubin deri atëherë. Edhe vetë tekniku italin deri në gjysëm të tetorit nuk e kishte kuptuar ende se ç’mund të bënte ky njeri. Krijoi afrimitet me të dhe ish- portieri i njohur nuk e zhgënjeu. I dha besim për të vazhduar punën dhe të dy sëbashku kanë “lidhur” skuadrën dhe me ndihmën e Bordit të ri të klubit të krijuar, arritën 5 fitore rradhazi duke bërë që Vllaznia të qëndrojë e qetë tashmë në renditje. Pesë muajt e qëndrimit në Shkodër të Baldo Rainerit kësisoj kanë patur uljet dhe ngritjet e veta por këta të fundit kanë qenë më të shumta dhe kanë lënë një shije ende të mirë.

-Baldoja, nga tatuazhet e flokët e gjata tek shenja e aeroplanit
Shumëkush e ka personifikuar me bluzat që ka mbajtur veshur, nga tatuazhet e shumta që ka në pjesët e ndryshme të trupit apo dhe flokët e gjata që nuk janë normale për një 52 vjeçar… shqiptar. Për një Italianojugor, ose më saktë të themi për një siçilian, edhe mund të jenë normale. Por risia e fundit e këtij trajneri, është shenja e aeroplanit që ai bën në momentin e shënimit të golave nga ana e skuadrës së tij apo atëherë kur mbaron krejt ndeshja. Ka ndodhur kështu pas shënimit të golit të Beqirit në ’90 në ndeshjen me Laçin të fituar pikërisht në fund apo pas fitores shumë të rëndësishme me Partizanin. Por në fakt kjo nuk është një gjë e re sepse shenjën e aeroplanit, mësohet se Baldoja e ka bërë edhe kur drejtonte në Zvicër.

-Trajneri nga Siçilia, shumë popullor në Shkodër
Baldo Raineri është bërë shumë popullor në Shkodër. I ardhur nga Zvicra ku jeton prej vitesh me familjen e tij, italiani shfaqet shumë I thjeshtë gjatë qëndrimit të tij në qytetin verior të Shqipërisë. Klubi I ka gjetur dy apartamente në qendër të qytetit, aty ku ai qëndron bashkë me kolegët e tij. Kohën e lirë nuk I pëlqen ta kalojë nëpër kafene. Preferon të ulet në stolat e pedonales kryesore dhe me telefon në dorë, flet ose komunikon me familjen. Përpos kësaj, nuk përton asnjëherë të komunikojë me tifozët e shumtë  (shumë dinë italisht) që ndalen dhe e pyesin për Vllazninë. Madje, nuk heziton as të bëjë foto kur ia kërkojnë. Ai ka arritur të bëjë shumë miq në këtë qytet, edhe femra, ndonjëra madje arrin ta konsideroj një mik shumë të mirë atë, aq sa edhe ka qarë ditën që Raineri mendoi të jepte dorëheqjen.

-Stafi, raporte  të ngushta me Nervin e Olivën
E ka zgjedhur vetë stafin teknik por jo të plotë. Zëvendëstrajnerin, Davide Belottin, të larguar pak kohë më parë, në fakt ia ka sjellë ish- presidenti Nava. Ndoshta edhe për këtë, raportet me të, nuk kanë qenë shumë të afërta. Krejt ndryshe me trajnerin e përgatitjes fizike, Daniele Nervin që të gjithë e thërrasin “profesor”. Po ashtu edhe trajneri I portierëve Sabino Oliva për të cilin në fillim e quanin qesharak për mënyrën si I stërviste portierët por pikërisht ai, e bëri Selimajn nga një I panjohur në një titullar të padiskutueshëm duke luajtur një rol të rëndësishëm në rezultatet e skuadrës. Kjo treshe trajnerësh shikohet kudo bashkë. Janë shumë të lidhur me njëri- tjetrin dhe padiskutim që meritën kryesore e ka “komandanti”, Baldo Raineri.

-Raineri, emri I plotë është Baldassare jo Baldo
Të gjithë e njohin dhe e thërrasin Baldo. Si në Shqipëri tani ashtu edhe në Zvicër ku jeton. Por në fakt emri I plotë I trajnerit aktual të Vllaznisë është- Baldassare. Ai ka lindur më 4 shtator 1962 në CastelVetrano në Siçili. “Emri ishte I gjatë dhe shokët e miqtë nuk e kishin të lehtë ta thërrasin kollaj emrin tim, prandaj nga Baldassare më thërrisnin shkurt Baldo e prandaj ashtu më mbeti”- thotë ai. Por nga ana tjetër, në profesion e thërrasin edhe ndryshe- Mister. Kjo është një fjalë që i pëlqen jo pak dhe kënaqet kur sportistët, drejtuesit apo gazetarët e thërrasin kështu.

-52 vjeçari “i dashuruar” me lojtarët e rinj
Trajneri i Vllaznia Baldo Raineri po bën atë që pakkush tjetër që e ka drejtuar këtë skuadër, ka bërë më parë. Ai po aktivizon lojtarë të rinj e të talentuar duke mos i vlerësuar nga mosha por nga ajo çfarë japin në fushë dhe nga e ardhmja e tyre. Për këtë, ai është vlerësuar jo pak sepse ka lënë në stol plot 7 blerje të bëra nga klubi në merkaton e verës (aktivizonte vetëm Sozën) duke i hapur vendin këtyre të rinjve. Edhe për këtë, ai ka fituar shumë popullaritet në opinionin sportiv shkodran i cili është edhe pak “patriarkal”. Dëshiron në maksimum të shohë në fushë djemtë e vet më mirë sesa disa anonimë të ardhur nga katër anët e botës.

-Karriera si trajner, Vllaznia “piaca” më e lartë
Për Rainerin karriera e deritanishme e tij si trajner nuk ka patur ndonjë CV kushedi se çfarë. Ai ka drejtuar përgjithësisht në kategorinë e dytë dhe të tretë në Zvicër. E ka nisur punën tek Bellinzona, për të vazhduar më pas tek Chiasso ndërkohë që në sezonin 2008-09 ka drejtuar ekipin FC Mendrisio për të kaluar më pas tek GC Biaschesi të cilën e ka drejtuar për tre vite me rradhë. Ardhja tek Vllaznia shënon kulmin e karrierës së tij si trajner dhe prandaj ai është duke e shijuar në maksimum këtë përvojë.