UEFA dënon Nejmar se ka postuar në Instagram! Vendimi i rrallë ka dalë sot nga zyrtar e institucionit që drejton futbollin në Europë, i cili ka vlerësuar si të papërshtatshme komentet që ka bërë sulmuesi brazilian pas ndeshjes së Ligës së Kampioneve mes PSG-së dhe Mançester Junajtid.
Braziliani ishte në tribunë në ndeshjen që skuadra e tij humbi 3-1 në shtëpi duke u eliminuar nga Liga e Kampioneve, por ai ishte dukshëm i inatosur me vendimet e gjyqtarin dhe menjëherë pas sfidës, në Instagram akuzoi gjyqtarët për penalltinë që kishin dhënë kundër ekipit të tij në minutën e fundit.
“Ky është një turp, kanë vendosur 4 persona që nuk kuptojë asgjë rreth futbollit të shohin gjërat me ngadalësim. Si mund ta vendosë dorën në shpatull. Të q***n!”, ishte komenti i futbollistit në rrjetet sociale. Këto fraza i kanë kushtuar shtrenjtë atij, pasi UEFA e ka pezulluar për tre ndeshjet e ardhshme në Ligën e Kampioneve.
Por Nejmar nuk është i pari që e pëson nga rrjetet sociale. Rasti i parë në historinë e ndëshkimeve të tilla i përket Serzh Orie, i cili gjithashtu ishte pjesë e PSG në marsin e vitit 2015 kur u dënua nga UEFA po me 3 ndeshje pezullim për postimet e tij në Facebook. /vipsport/
