Klubi i futbollit Vllaznia është vënë menjëherë në lëvizje në lidhje me bojkotimin e stërvitjes nga ana e futbollistëve ditën e sotme. Duket se ka qenë presidenti i këtij klubi Agron Çela ai që ka marrë përsipër zgjidhjen e tij. Menjëherë pas mbylljes së disa angazhimeve politike, bëhet e ditur se ka thirrur në një takim në zyrën e tij të gjithë futbollistët që kanë pretendime dhe ka mësuar prej gojës së tyre për atë se çfarë kërkojnë. Natyrisht që janë disa detyrime të prapambetura që nuk kanë të bëjnë me z. Çela por me Bashkinë Shkodër dhe që i përkasin periudhës deri më 31 janar, kur presidenti aktual ende nuk kishte firmosur kontratën e bashkëpunimit me klubin shkodran. Por miratimi i një fondi prej 100 milionë lekësh në muajin shkurt nga ana Bashkisë për likujdimin e këtyre detyrimeve të prapambetura, donte disa ditë kohë për të bërë kalimin e parave në arkën e klubit. Pikërisht kjo situatë çoi në një tejzgjatje të likujdimit të këtyre rrogave dhe detyrimeve kontraktuale megjithatë ashtu siç premtoi pasditen e sotme edhe administratori Gjyrezi, kjo çështje do zgjidhet shpejt. Por me ndërhyrjen e presidentit Çela duket se ajo do zgjidhet edhe më shpejt. Madje pikërisht për këtë gjë, ai ka mbledhur lojtarët në zyrën e tij dhe në orën 20.30 në sallën e konferencave të shtypit të Grand Hotel “Europa” para mediave do të deklaronin se nuk ka asnjë çështje rrogash tek Vllaznia.Gjergj KOLA
