Redi Kasa, u bashkua me Egnatian në merkaton e janarit dhe i ka mahnitur të gjithë me paraqitjet e shkëlqyera.I ftuar në emisionin “Skaner” në MCN TV, fantazisti foli për kualifikimin e Egnatias në finalen e Kupës së Shqipërisë.
Sipas tij, tek Egnatia ishte ëndërr kualifikimi në finale, ndërsa shtoi se kjo u arrit falë një pune të palodhur nga e gjithë skuadra. I pyetur për rivalët, Kasa deklaroi se Tirana i pëlqen për mënyrën si luan, por shtoi se Egnatia ka më shumë kualitete në ekip.
“Mendoj se e merituam kualifikimin ndaj Vllaznisë. Për Egnatian është një ëndërr që mbërrin në finale. Një ëndërr që e kemi fituar edhe falë të një pune të madhe. Skuadra punon shumë çdo ditë. Ka kualitet skuadra për të qenë në finale dhe për ta pasur një mundësi.
Nuk ka mbaruar asgjë, jemi të tretët në kampionat, për Europën. Jemi të gjithë të përqendruar dhe jam i bindur se skuadra do bëjë mirë në këto ndeshje të mbetura.
Rezultatet vijnë vetëm duke punuar fort. Futbolli kështu e ka, në momente të ndryshme, humbet dhe fiton. Sapo gabon diçka të vogël, në detaje të vogla, i tillë është futbolli dhe e humbet ndeshjen.
Tirana ka shumë eksperiencë dhe më pëlqejnë si luajnë. Sa i përket kualitetit, mund të them se jemi pak më sipër, sa i përket kualitetit të lojtarëve dhe të ekipit”- është shprehur Kasa.
