Nejmar mund të jetë lojtari më i kushtueshëm në historinë e futbollit botëror, por ai që mahnit me statistikat e tij në radhët e PSG vazhdon të jetë adoleshenti Kilian Mbape. Francezi ka thyer sot një tjetër rekord në Ligën e Kampioneve, duke u konfirmuar një golashënues race e duke lënë pas shumë nga emrat më të njohur në historinë e turneut. Me rrjetën e shënuar ndaj Bajern Mynih, në moshën 18 vjeç, 11 muaj e 15 ditë, ai u bë futbollisti më i ri që arriti kuotën e 10 golave në këtë turne, një bilanc mbresëlënës për një djalosh i cili brenda vitit ka bërë që nga ai të kthejë kokën i gjithë opinioni sportiv botëror.
Rekordin më parë e mbante një bashkëkombas i tij, Karim Benzema, i cili në radhët e Lionit, arriti këtë kuotë në moshën 20 vjeç, 10 muaj e 2 ditë. Golashënuesit më të rinj që kanë arritur kuotën e 10 golave në Ligën e Kampioneve
Kilian Mbape – 18 vjeç, 11 muaj e 15 ditë
Karim Benzema – 20 vjeç, 10 muaj e 2 ditë
Havier Saviola – 21 vjeç e 3 muaj
Lionel Mesi – 21 vjeç, 3 muaj e 7 ditë
Raul Gonzalez – 21 vjeç, 3 muaj e 24 ditë
Uejn Runi – 22 vjeç e 14 ditë
