E teksa ndarja nga jeta e Rafael Duamenës vijon të prodhojë trishtim në radhët e klubit rrogozhinas, skuadra vijon përgatitjet për duelin që do të luajë me Partizanin në kuadër të javës së 13-të.
Trajneri Edlir Tetova e nisi seancën stërvitore me ushtrime fizike. Më tej shtoi intensitetin duke kryer për më shumë se 70 minuta ndeshje kontrolli brenda skuadrës. “Timonieri” durrsak dhe ndihmësi i tij Julian Brahja u panë të këshillonin futbollistët që të luajnë topin gjithmonë në zona të sigurta që gjatë ndeshjeve zyrtare sidomos në fundin e tyre të mos rrezikojnë rezultatin.
Kjo qasje vjen, pasi Egnatia ka vuajtur disi në minutat e fundit të sfidave sidomos në ndeshjet e fundit. Me Tiranën në transfertë ishte portieri Alen Sherri që bëri një ndërhyrje vendimtare, duke ruajtur 3 pikët në minutat shtesë. Kundër Skënderbeut, bardhejeshilët u ndëshkuan në limitet e kohës së rregullt, ndërkohë që edhe Kukësi i vendosi në vështirësi rrogozhinasit në kohën shtesë.
Në fund të seancës stërvitore lojtarët tentuan goditjet në drejtim të portës. Sa u takon finalizimeve më të sakta ra në sy Bledar Lila, Donald Mëllugja dhe Emiljano Musta. Të tre lojtarët rezultuan më efikasë me tentativat e tyre në drejtim të kuadratit të mbrojtur nga Alen Sherri dhe Ilir Dobjani.
MUNGESAT – Ajo që ra në sy te seanca stërvitore e zhvilluar ditën e djeshme në kompleksin sportiv “Egnatia” ishte mungesa e dy lojtarëve titullarë. Bëhet fjalë për Renato Malotën, i cili pas ndarjes nga jeta të Rafael Duamenës pritet të jetë edhe kapiteni i Egnatias dhe mesfushori Albano Aleksi.
Të dy lojtarët janë stërvitur rregullisht të mërkurën dhe ditën e djeshme nuk ishin prezentë për arsye personale. Edhe Gytis Paulauskas nuk është pjesë e skuadrës për shkak se sulmuesi është grumbulluar me ekipin kombëtar të Lituanisë. 24-vjeçari është një titullar i padiskutueshëm me përfaqësuesen e tij, duke rezultuar edhe vendimtar me golat e tij.
