Vllaznia po zhvillon një sezon të dobët dhe jo brenda pritshmërive e synimeve në Abissnet Superiore dhe një gjë e tillë tashmë është një fakt i njohur. Jo më kot, klubi ka ndërruar tre trajnerë, siç janë Josa, Miloti dhe Sedloski, për shkak se gjërat nuk po shkonin si duhet.
Megjithatë, duket se sikur tashmë ekipi është futur disi në shina. Aktualisht, skuadra është në kuotën e 41-pikëve dhe mban vendin e katërt në klasifikim, me vetëm një pikë më pak se Egnatia e vendit të tretë, që mban pozicionin që të dërgon në Europë.
Ndërkohë, “Shkodra Sport” i ka bërë një vëzhgim 28-javëve të ekipit të Vllaznisë këtë sezon me pozicionet që ka mbajtur në klasifikim javë pas jave. Ajo që bie në sy janë të dhëna që nuk japin shumë shpresë.
Vitet e fundit, Vllaznia gjithnjë ka hyrë në kampionat me pretendimin për të qenë të paktën në tri vendet e para. Në sezonin e fundit nuk ia kanë dalë të jenë aty, por të paktën e provuan para dy sezonesh duke qëndruar gjatë gjithë kampionatit në vendin e parë ose të dytë dhe duke synuar titullin kampion, edhe pse nuk ia dolën.
Ndërkohë, këtë sezon gjërat janë edhe më të zymta, teksa asnjëherë nuk ka qenë pretendente serioze për titullin kampion ose e përkthyer më ndryshe në vendin e parë. Në një kohë që, drejtuesit dhe presidenti Alban Xhaferi pretendojnë të shpëtojnë sezonin, duke marrë pjesë këtë vit në Kupat e Europës, tashmë duket se ato janë gjithnjë e më afër për faktin se ekipi është futur disi në shina.
Gjithsesi, vendi i parë është vetëm nëntë pikë larg dhe në lojë janë ende edhe 24 në total. Prandaj, gjithçka është e mundur, edhe pse gara sa vjen e bëhet më e vështirë, me kreun e renditjes që duket gjithnjë e më larg.
Sa u përket renditjeve në këto 28-javë, pozicioni më i lartë që kanë mbajtur kuqeblutë këtë sezon ka qenë vendi i dytë, pikërisht në javën e tretë, në javën e 20-të dhe në javën e 21-të, pasi mposhtën Tiranën në kryeqytet, Kukësin në Shkodër dhe Tiranën po në Shkodër. Ekipi nuk numëron asnjë vend të parë, ndërsa gjashtë herë janë pozicionuar të tretët.
Në të katërtin, shkodranët kanë qenë për 10-javë, ndërsa vendin e pestë dhe të gjashtë e kanë mbajtur përkatësisht pesë dhe tre herë. Në pozicionin që të dërgon në “play-out”, kuqeblutë kanë qenë vetëm një herë.
Të dhëna këto që tregojnë se shkodranët kanë qenë gjithnjë pak a shumë në zonën e mesit të tabelës dhe për asnjë moment nuk kanë gjetur qetësi. Edhe tashmë që janë në vendin e katërt, ndodhen në rrezik për Europën. Megjithatë, vendi i tretë është vetëm një pikë larg. /Maringlen ZHIVANI/
Vendi i parë: 0-herë
Vendi i dytë: 3-herë
Vendi i tretë: 6-herë
Vendi i katërt: 10-herë
Vendi i pestë: 5-herë
Vendi i gjashtë: 3-herë
Vendi i shtatë: 0-herë
Vendi i tetë: 1-herë
Vendi i nëntë: 0-herë
Vendi i dhjetë: 0-herë
