Me ardhjen e Mikel Artetas në postin e trajnerit, skuadra e Arsenalit është kthyer në ‘binarë’.
Para Artetas, skuadrën londineze e drejtoi Unai Emery, trajner me të cilin ‘Topçinjtë’ ishin në një formë katastrofale.
Në formë të dobët ishte edhe Granit Xhaka, i cili nuk jepte më të mirën nga vetja.
Madje, ai ishte shumë pranë largimit nga skuadra pas një incidenti me tifozët e Arsenalit në tetor të vitit të kaluar.
Megjithatë, me ardhjen e Artetas, Xhaka u rikthye në formacionin bazë dhe sot është mesfushori më i rëndësishëm në skuadër.
Megjithatë, në 18 muajt e fundit, futbollisti nga Kosova ka pësuar një rënie drastike të vlerës në tregun e transferimeve, gjithnjë sipas ‘TransferMarkt’.
Në dhjetor të vitit 2018, Xhaka kushtonte 45 milionë funte, kurse më 1 korrik të vitit të kaluar, vlera e tij ra në 40 milionë funte.
Dhe tani, Xhaka kushton vetëm 27 milionë funte – një rënie prej 40 përqind e vlerës së tij në 18 muajt e fundit.
