“Është ulur numri i ndeshjeve të dyshuara në Kategorinë Superiore. Mund të numërohen me gishtat e njërës dorë.
Për sa kohë janë vetëm dyshim, s’mund të akuzojmë askënd”, – shprehej Armand Duka në një intervistë të tij në fundin e vitit të kaluar.
Dhe dosja e ndeshjeve të dyshuara sapo është shfaqur sërish në FSHF. UEFA, siç bën me dije “Sport Ekspres”, i ka dërguar së fundi Federatës raportet e kompanisë “SportRadar”.
Në këtë dosje në fakt janë tetë ndeshje të dyshuara, me luhatje anormale kuotash. Pra, më shumë se gishtat e njërës dorë.
Bie në sy fakti se në gjashtë prej tetë ndeshjeve të dyshuara është e përfshirë Lushnja, skuadër që ka rënë në Kategorinë e Parë tashmë.
Po ashtu, janë të dyshuara edhe dy ndeshje të Kupës së Shqipërisë, që do të thotë se bëhen 10 ndeshje të dyshuara në total.
Trukimi i ndeshjeve është një “gangrenë” në futbollin shqiptar dhe, edhe pse numri i ndeshjeve të dyshuara mund të jetë ulur në krahasim me më parë, mbetet një fenomen tejet shqetësues. / Vipsport/
