Më në fund do të mësojmë edhe lojtarët e përzgjedhur nga Kristian Panuçi. Vetëm nëntë ditë nga ndeshja e parë kualifikuese, italiani i Kombëtares shqiptare do të vërë në dispozicion të publikut listën me të grumbulluarit e tij për ndeshjen me Turqinë dhe Andorrën.
Të paktën, siç edhe ka njoftuar vetë Panuçi në një prononcim të fundit mediatik gjatë javës së shkuar. Po çfarë pritet këtë herë?
Çfarë idesh ka përzgjedhur italiani dhe mbi të gjitha, çfarë lojtarësh ka thërritur për t’i vënë në zbatim ato?
LISTA – “Panorama Sport”, me anë të burimeve pranë institucionit të futbollit apo edhe Kombëtares shqiptare, ka mësuar se trajneri ka hequr dorë nga eksperimentimet dhe sot pritet një listë me Kombëtaren “bazë”.
Futbollistë të konfirmuar dhe elementë mbi të cilat italiani pritet që të bazojë punën e tij. Sigurisht, duke mos pasur paraprakisht një listë përpara, marshi i gabimit mund të jetë i pranueshëm, por burimet bëjnë me dije disa prej emrave të “përjashtuar” nga kjo listë.
Ermir Lenjani, Azdren Llullaku, Rei Manaj e Keidi Bare janë disa prej emrave që duket se Panuçi nuk i ka preferuar për këtë sfidë.
Tre të parët kanë luajtur me skuadrat e tyre respektive, kanë shënuar dhe ofrojnë garanci për manovrën sulmuese.
Ndërkohë, i fundit po bën mirë me Malagan në Ligën e Dytë spanjolle, duke fituar një vend titullari dhe duke marrë përsipër manovrën e skuadrës në këtë repart.
Por, asnjëri prej të sipërpërmendurve nuk ka pasur një ftesë, të paktën deri dje, nga sa bëjnë me dije burimet. Një tjetër mungesë do të jetë ajo e kapitenit Mërgim Mavraj.
Nisur nga pezullimi me 3 ndeshje, mbrojtësi nuk do të jetë në dispozicion. Gjithashtu, Odise Roshi nuk është riaftësuar ende në masën 100% për të qenë i gatshëm për grumbullimin.
RISITË– Kristi Qose është një nga emrat e paktë që mund të jetë risi në këtë grumbullim. “Panorama Sport” e ka njoftuar prej ditësh ekskluzivisht grumbullimin e shtatlartit të Ruzemberok.
Rikthim në këtë listë mund të jetë ai i Armando Sadikut, i Eros Grezdës si dhe i Amir Abrashit. Tre lojtarë që kanë kaluar dëmtime në periudhat e fundit dhe që mund të japin shumë në Kombëtare.
Ivan Balliu gjithashtu pritet të ketë një vend në prapavijë, po ashtu si edhe Myrto Uzuni apo Bekim Balaj në repartin e avancuar.
