Të gjithë e njohin Mirçea Luçeskun si një nga emrat e mëdhenj që ka prodhuar futbolli ballkans, për vitet e tij në fushë e lojës, por sidomos si trajner i suksesshëm në arenën ndërkombëtare duke drejtuar shumë skuadra me emër mes të cilave Interin, Beshiktash, Shakhtar Donjeck, përfaqësuesen e Rumanisë e së fundmi atë të Turqisë.
Por e kaluara në futboll e trajnerit të rivalëve të parë të Shqipërisë në grupin eliminator të Europianit, është njollosur nga dëshmia e një ish-trajneri, Ioan Sdrobish, dhe ish-lojtarëve të tij, Nae Stanciu dhe Klaudio Vasiçovici.
Sdrobish deklaroi se në dy raste kudnër tij, Mirçea Luçesku kishte ndërhyrë direkt për të manipuluar reaultatin e takimit. Ndeshja e parë e cila kishte përfunduar me udhëzimin e Luçeskut 3-3 ishte ajo mes Otelul Galati dhe Dinamo Bukuresht në vitin 1987.
Luçesku kishte kërkuar që Ridion Çamataru të shënonte tre gola që të shpallej golashënuesi më i mirë në Europë dhe kishte mbledhur lojtarët e të dy skuadrave në dhomat e zhveshjeve, duke gjetur akordin para takimit. “Mua ma kërkuan lojtarët, ndryshe nuk do ta kisha bërë. Mashtruam njerëzit në stadium”, tha ai.
Çamataru shënoi 3 golat për Dinamon, fitoi titullin e golashënuesit më të mirë në atë edicion, por trofeu nuk iu dha pasi shënoi 18 gola në 6 ndeshjet e fundit të kampionatit dhe ishte e dukshme që kishte akorde për të bërë një gjë të tillë.
Por jo vetëm kaq, në vitin 1997, kur Luçesku drejtonte Rapid të Bukureshtit, ishte përballur me CSM Reshita që drejtohej nga Sdrobish. Në këtë rast, ndeshja përfundoi 6-1 për Rapid, me 5 gola në pjesën e dytë dhe me lojtarët që ishin paguar për të toleruar. “Para ndeshjes, lojtarët erdhën e më thanë që nuk kishin para”, justifikoi ai toleromi e skuadrës së tij në ndeshjen kundër ekipit të Luçeskut në emisionin e GSP Live.
Ndërkohë, futbollistët Stançu dhe Vasiçovici, treguan me detaje dy ndeshje në të cilat Luçesku u kishte kërkuar futbollistëve të vet që të fiksonin rezultatin, ndaj Rocas dhe FCM Bakau. /vipsport/
