Kristiano Ronaldo ishte i pakapshëm mbrëmë në Ligën e Kampioneve përballë Juventusit, duke kaluar me lehtësi mbrojtësit për të shënuar dy gola e dhënë një asist në fitoren 3-0 ndaj bardhezinjve.
“Është vdekjeprurës, të shënon gjithmonë, të gjithëve”, ishte dëshpërimi i Andrea Barzaljit pas sfidës, ndërsa fliste për portugezin.
Por këto fjalë kanë ndeshur menjëherë në kundërshtimin e rivalëve të Juventusit, napolitanëve.
Këta të fundit, në postime të shumta të rrjeteve sociale, kanë kujtuar se si në sezonin e kaluar, në duelin me eliminim direkt mes Napolit dhe Real Madrid, Kristiano Ronaldo nuk gjeti rrugën e rrjetës.
“Hysaj që bllokon Ronaldon duhet të hyjë në histori gjithsesi”, shkruanin tifozët napolitanë, duke u kujtuar atyre juventinë se e kishin ata zgjidhjen e problemit për portugezin, edhe pse në fakt u mundën në të dy sfidat përballë madrilenëve.
Disa prej tyre kanë kujtuar edhe se mbrojtësi shkodran nuk e kishte lejuar Ronaldon të shënonte as në duelin me përfaqësuesen.
Që nga dy ndeshjet ndaj Napolit ku nuk gjeti rrjetën, Ronaldo ka shënuar në 13 nga 14 ndeshjet e radhës në Ligën e Kampioneve, duke mos arritur të realizonte vetëm në një nga takimet gjysmëfinale të edicionit të kaluar ndaj Atletiko Madrid. /vipsport/
