Në ndeshjen e djeshme ndaj Tiranës ka qenë ndër më të mirët në fushën e lojës. Pikët e shumta të shënuar nga pozicioni 3 apo dhe blloku i suksesshëm në shumë raste, e kanë bërë Ditmir Rrashketën një pikë të fortë të Vllaznisë.
Në një prononcim për “Shkodra Sport” ai shprehet kështu në lidhje me ndeshjen ndaj Tiranës dhe sfidat që e presin ekipin shkodran ndaj Partizanit: “Me Tiranën besoj se bëmë një paraqitje shumë të mirë, në një ndeshje me emocione, megjithatë mund t’ia dalim edhe me Partizanin. Një skuadër që e njohim mirë dhe që e kemi mundur dy herë këtë kampionat. Kjo tregon se mund të fitojmë sërish ndaj saj, por kurrsesi duke e nënvlerësuar.
Mundësitë dhe përgatitjen për ta bër një gjë të tillë e kemi. Objektivi i Vllaznisë e kemi deklaruar se është titulli kampion dhe kjo është plotësisht e arritshme. Shpresoj t’ia dalim dhe të përsërisim sërish ato emocione që kemi përjetuar edhe në titullin e para dy viteve”.
Lojtari me përvojë i Vllaznisë ndërkohë ndalet edhe tek një fakt tjetër. mbështetja e tifozëve dhe kërkon më shumë për ndeshjen e së dielës. “Kemi treguar se me tifozët përkrah bëjmë gjëra të mira. Ato i konsiderojmë një pjesë shumë të rëndësishme të skuadrës, njëlloj sikur të ishte lojtar i saj. Shpresoj që këtë herë të kemi më shumë tifozë për ta na mbështetur dhe në fund të gëzojmë sëbashku me ta”.
© shkodrasport.com
