Chelsea humbi të hënën 4-1 ndaj Watford, në “Vicarage Road”. Disfata e tretë në katër ndeshjet e fundit, teksa mezi ka fituar dy nga 10 ndeshjet e fundit, ka bërë që të ngrihen të gjitha alarmet në “Stamford Bridge”.
Vazhdimësia e Antonio Contes në stolin blu është më e diskutuar se kurrë, pas performancës sportive të ekipit dhe mosmarrëveshjeve midis trajnerit italian dhe menaxhmentit të klubit.
I katërti në Premier League, ekipi i Chelsea u eliminua në gjysmëfinale të Kupës së Ligës kundër Arsenalit, edhe pse mbetet ende “gjallë” në “FA Cup”, ku do të përballet me Hull City në raundin e dytë dhe Ligën e Kampionëve, në të cilin kundërshtari i tij do të jetë Barça.
Ky klub i Londrës ka pësuar shumë hyrje-dalje të trajnerëve gjatë viteve të fundit. Villas-Boas, Di Matteo, Benitez, Mourinho, Hiddink dhe Conte kanë qenë “qiramarrësit” e fundit të stolit blu, që nga viti 2011.
Antonio Conte mund të jetë trajneri i tetë i shkarkuar në një vit në Premier League. Nëse konfirmohet, largimi i tij do të ishte i pesti nga gjashtë fituesit e fundit të titullit në Angli, që shkarkohen sezonin pasues.
Mancini, Ferguson (në pension), Mourinho dhe Ranieri i lanë klubet e tyre përkatëse pas arritjes së lavdisë, ndërsa Pellegrini mezi zgjati një vit tjetër.
Roberto Mancini, kampioni i parë që bie
Sezoni 2011-202012 gjithmonë do të mbahet mend nga “qytetarët”. Pas 44 viteve “thatësirë”, të besuarit e Roberto Mancinit fituan titullin në Premier League. Një gol nga Dzeko dhe një tjetër nga Agüero, në minutën e fundit, kundër QPR, kulmuan një rikthim historik.
Kjo fitore u mjaftoi “qytetarëve” për t’u shpallur kampionë. Megjithatë, sezonin pas trajneri italian u shkarkua, pas humbjes në finale të “FA Cup” kundër Wigan. Ai nuk arriti asnjë nga objektivat e sezonit, përveç kualifikimit për në Ligën e Kampionëve.
Sir Alex Ferguson i la “Djajtë e Kuq” në krye
Në vitin 2013 ishin “Djajtë e Kuq”, ata që e fituan Premier League. Katër javë përpara përfundimit të kampionatit, Manchester United siguroi titullin në Angli me Sir Alex Ferguson në stol.
Ky ishte sezoni i fundit i trajnerit skocez, i cili do të tërhiqej në fund të sezonit 2012-2013, pas 26 sezoneve dhe 38 titujve.
Pellegrini, i vetmi që duroi
Mauricio Pellegrini fitoi titullin në Premier League, në sezonin 2013-202014, me dy pikë sipër Liverpool-it të drejtuar nga Rodgers, në një fushatë që gjithmonë do të mbahet mend nga hapat e gabuar të Gerrard në takimin ku Liverpool dhe Chelsea e lanë në “pjatë” titullin për “skyblues”.
Trajneri kilian arriti të drejtojë në sezonin e ardhshëm, derisa në shkurt të vitit 2016, ekipi i “qytetarëve” njoftoi se Pep Guardiola do ta zëvendësonte Pellegrinin në stol për sezonin vijues.
Gjysmëfinalet e arritura nga “skyblues”, për herë të parë në historinë e tyre, në Ligën e Kampionëve, nuk ishin të mjaftueshme për udhëheqësit e klubit, që ta mbanin atë në stol.
Mourinho, nga “parajsa në ferr” për shtatë muaj
Titulli i pestë në Premier League për Chelsea erdhi me Mourinhon në stolin blu, në sezonin 2014-2015. Një sezon praktik i papërlyer i klubit nga Londra, që ngriti një tjetër titull, që mungonte nga viti 2010.
Shtatë muaj më vonë, “Luso” u ndal, pasi humbi 9 nga 16 ndeshjet e luajtura deri në atë moment në Angli. “Të dyja palët, José dhe bordi i drejtorëve, pajtohen se rezultatet nuk kanë qenë të mira këtë sezon dhe besojnë se interesi më i mirë i të gjithëve është që të ndahen”, – tha Chelsea në një deklaratë, në dhjetor 2015.
Ranieri, nga kryevepra deri te papunësia
Sezoni 2015-2016 i Premier League hyri në histori për shkak të kryeveprës së Leicester City, të drejtuar nga Claudio Ranieri. Të besuarit e trajnerit italian ngritën në duar titullin e parë në Premier League që nga themelimi i tyre si klub, më 1884.
Një sezon që nisi me kuota të tilla bastesh, 5000 x 1, kundër tyre, por në të cilat kulmuan një “përrallë”, që kurrë nuk do të harrohet në botën e futbollit. Nëntë muaj më vonë, arkitekti i atij triumfi u shkarkua nga drejtimi i “Dhelprave”, pasi luajtën në 16-she të fundit të Ligës së Kampionëve, kundër Sevilla.
Rezultatet e këqija në Angli, si dhe problemet e brendshme me disa “pesha të rënda” të ekipit në dhomat e zhveshjes ishin shkas për largimin e italianit./telesport/
