Komentatori, gazetari dhe staticieni i mirënjohur Ymer Striniqi është kujtuar edhe në trevjetorin e ndarjes së tij nga jeta nga kolegët dhe nxënësit e tij.
Pasditen e sotme në kompleksin sportiv “Fredi”-Juban, është zhvilluar edicioni i tretë i kupës me emrin e tij.
Në të kanë marrë pjesë katër ekipet e televizioneve lokale të Shkodrës, pikërisht ato të TV Rozafës, TV1 Channel, Star Plus TV dhe RTSH.
Sipas shortit të hedhur, ndeshja e parë ka qenë ajo në mes RTSH dhe Star Plus, fituar nga i pari me rezultatin 3-2 që siguroi kësisoj daljen në finale.
Më pas është zhvilluar ndeshja e dytë, ajo në mes TV1 Channel dhe TV Rozafa. Ka fituar kjo e fundit 4-1 duke siguruar edhe ajo finalen.
Finalja e edicionit të tretë të kupës “Ymer Striniqi” e arbitruar nga Agron Kastrati dhe e vëzhguar nga Mhill Shkëmbi, është diskutuar në mes ekipeve të RTSH-së dhe TV Rozafa.
Ndeshja ka qenë e fortë dhe në përfundim të saj është arritur rezultati i barabartë 2-2. Edhe shtesa 5 minutëshe nuk ka dhuruar gol dhe kësisoj të dy ekipet i janë drejtuar pikës së penalltisë për shpalljen e fituesit.
Më të saktë janë treguar lojtarët e RTSH-së të cilët kanë fituar 3-1 dhe kësisoj janë shpallur fitues të kësaj kupe.
Kapitenit të këtij ekipi, kameramanit të mirënjohur Kujtim Draçini, kupën ia ka dorëzuar vajza e profesor Ymerit, Edlira Striniqi, e shoqeruar nga i biri.
Ajo para të pranishmëve ka shprehur emocionet për kujtimin që vazhdojnë t’i bëjnë kolegët babait të saj.
Natyrisht kjo është minimumi i asaj që mund të bëjmë për të nderuar një figurë të tillë si ajo e profesor Striniqit.
Njeriut simbol të gazetarisë dhe shembull për të gjithë ne. Padyshim që kupa me emrin e tij do të vazhdojë edhe në edicionet e ardhshme sepse profesor është dhe do të jetë i pavdekshëm për të gjithë ne.
© shkodrasport.com
