Orges Shehi kërkonte qarkullim topi dhe kujdes në fazën e moszotërimit për t’u nisur me shpejtësi në kundërsulm e për ta zënë në befasi Teutën. Nga ana tjetër, Martini kërkonte presing të lartë nga dy lojtarë në momentin kur Tirana do të kishte kontakt me topin.
Në tribunën VIP, presidenti Teutës ka qenë i pranishëm nën shoqërinë e miqve, ndërsa presidenti i Tiranës pas përfundimit të ndeshjes zbriti në dhomat e zhveshjes dhe përgëzoi ekipin për fitoren.
Ekipet dolën pak më herët në fushë dhe gjyqtari priti afro një minutë derisa të shkonte ora 16:00 për t’i rënë bilbilit për nisjen e ndeshjes. Në momentin kur Avdyli godet nga distanca, i gjithë stoli i Teutës çohet në këmbë, por gëzimi mbetet në mes. Shehi kërkon nga Toli që të lëvizë në fushën e lojës. “Zbrit poshtë Toli, zbrit poshtë”.
Trajneri Martini gjatë ndeshjes e kishte me disa lojtarë në veçanti: “O Daje po ndërroje krahun! O Ale, o Ale (Aleksit) ruaj qetësinë ç’ke”. Trajneri i Tiranës ka pakënaqësi, kësaj radhe me mesfushorin Ismajlgeci: “O Marsel, mos u hap në krah aq shumë”.
