Sulmuesi i Teutës, Rubin Hebaj është ndalur të flasë për ecurinë e durrsakëve këtë sezon. I rikthyer në futbollin shqiptar pas një eksperience te Vorskla në Ukrainë, shkodrani i sulmit ka rrëfyer për newsport.al se përse zgjodhi të veshë fanellën e Teutës para asaj të Vllaznisë, që është edhe vendlindja e tij.
21 vjeçari është aktivizuar në 11 ndeshje nën drejtimin e trajnerit Edi Martini, duke ia dalë të shënojë edhe një gol me “Djemtë e Detit”. Mbi të gjitha forma e mirë dhe krijimi i hapësirave për skuadrën, ka bërë që sulmuesi të jetë i preferuari i stafit teknik.
Ish-kampion sezonin e shkuar me Partizanin, Hebaj ka treguar se Tirana është me një dorë te titulli dhe një gjë të tillë duhet ta tregojë se e meriton në ndeshjen derbi ndaj Partizanit. Hebaj mban për vete “sekretin” e golave në derbi, pasi kujtojmë se sezonin e shkuar ndëshkonte bardheblutë me 2 të tillë në një ndeshje, duke siguruar tri pikë me vlerë.
Hebaj ka mbajtur veshur fanellën e ekipit Kombëtar U21, ndërsa është një sulmues perspektive për të ardhmen kuqezi. Dëshira e shkodranit është fitimi i Kupës së Republikës këtë sezon me Teutën, duke plotësuar ëndrrën e tifozëve për 100 vjetorin e klubit.
– Jeni rikthyer në Shqipëri dhe menjëherë deçiziv në sulmin e Teutës. Çfarë prisni nga ndeshjet e fundit të sezonit?
Të them të drejtën më mungonte të kisha vazhdimësi minutash. Këtu po arrij formën e mirë sportive nga java në javë dhe po ndihem shumë mirë me çunat e ekipit.
– Tri pikë me vlerë ndaj Skënderbeut dhe një transfertë delikate në fundjavë. Si po e përgatit Teuta ndeshjen me Kukësin?
Ne po tregojmë vazhdimësi dhe kjo besoj është nga forma e mirë fizike që kemi. Ne kemi sakrifikuar shumë dhe gjatë kohës që ishim pushim duke bërë stërvitje çdo ditë pa ndaluar asnjë moment dhe kjo besoj se po tregon frytet në këto ndeshje që po zhvillojmë. Ndeshjet i marrim 1 nga 1 dhe e vleresojmë çdo kundërshtar si më të vështirin. Kjo besoj na motivon dhe na ka sjellë te suksesi.
– Pas iu ndjek Laçi dhe Partizani në renditje, mendoni se Teuta do e ketë të lehtë sigurimin e zonës Europiane?
E lehtë nuk është asgjë në futboll, sidomos kur ke 2 ekipe shumë të mira si Laçi dhe Partizani që të ndjekin nga pas për një vend në zonën europiane. Gjithsesi ne kemi objektivat tona dhe besoj me moralin lart dhe me lojën e mirë që po bëjmë pse jo të tentojme dhe vendin e dytë.
– 11 ndeshje me Teutën dhe një gol qysh prej rikthimit në Shqipëri. Çfarë synon Hebaj nga sezoni aktual?
Nga sezoni aktual shpresoj të jemi në zonën europiane deri në fund dhe të fitojmë Kupën e Shqipërisë. Eshtë mundësia dhe shpresoj shumë që pas titullit të kampionatit që fitova vitin e kaluar të fitoj këtë vit dhe Kupën e Shqipërisë. Do ishte shumë e bukur sepse do vinte 1 Kupë për 100 vjetor në qytetin e Durrësit, gjë që tifozët e presin prej kohësh.
– Do të qëndroni me durrsakët edhe më tej apo synoni të zhvendoseni sërish jashtë Shqipërisë?
Për momentin jam i fokusuar të jap maksimumin dhe të shënoj sa më shumë të jetë e mundur për Teutën. Pjesa tjetër pas kampionatit i përket merkatos dhe nuk di te flas për momentin për këtë pjesë. Në qoftë se do ketë diçka të re në karrierën time besoj që do merret vesh shumë shpejt.
– Çfarë nuk shkoi te aventura me Vorsklën në Ukrainë?
Ekipi nuk po shkonte mirë me rezultate. Unë në planin personal nuk po merrja shumë pak minuta dhe ishim shumë lojtarë të huaj, gjë që binte në sy nga ekipet e tjera që kishin shumicën e lojtarëve vendas. Kjo solli dhe largimin tim dhe të shumë lojtarëve të huaj nga Vorskla. Gjithsesi une i uroj shumë fat atyre dhe shpresoj të qëndrojnë në Superligën ukrainase.
– Në medie është folur se përpara se të vendosnit të zgjidhnit Teutën ju ka kontaktuar edhe Vllaznia, skuadra e vendlindjes. Çfarë ndikoi në këtë pjesë?
Të them të drejtën unë zgjodha Teutën jo nga plani financiar por nga objektivat që kishte klubi. Doja një klub që të luftoja deri në fund për një objektiv. Kjo më bën të motivohem më shumë dhe të jap maksimumin tim. Gjë që te Vllaznia nuk e shikoja. Gjithashtu profesor Martini më ka ndihmuar shumë si fizikisht, teknikisht, taktikisht po ashtu dhe psikologjikisht mbi të gjitha që të rritem sa më shumë.
– Keni një të kaluar te Partizani dhe keni vendosur një nga derbit me Tiranën. Meqë jemi në javën e kësaj ndeshje, si e parashikoni këtë duel?
Derbi nuk parashikohet asnjëherë. Shpresoj të ketë sa më shumë spektakël sepse ajo ndeshje nuk varet nga pozitat në tabelë. I ka të trija rezultatet brenda dhe shpresoj të fitojë më i miri.
– Ka Rubin Hebaj një recetë për t’iu treguar lojtarëve të Partizanit sesi fitohet ndeshja ?
Tani une po luaj me Teutën dhe gjërat kanë ndryshuar te Partizani nga viti i kaluar. Nuk di të them se si mund ta fitojnë ndeshjen. Ajo ndeshje siç e thashë nuk parashikohet asnjëherë.
– Katër javë nga fundi i sezoni, mendoni se Tirana është me një dorë te titulli kampion apo derbi me “Demat” do vendosë fatet e sezonit?
Mendoj se Tirana është shumë pranë titullit kampion. Këtë duhet ta tregojnë dhe në derbin kundër Partizanit. Ta tregojnë që e meritojnë.
– Si ndikoi pandemia në ecurinë fizike të sportistëve dhe futbollit shqiptar në përgjithësi?
Pandemia ndikoi shumë keq në çdo aspekt, gjithsesi futbolli po vjen drejt normalitetit dhe shpresoj që sa më shpejt të kemi dhe tifozat në shkallët e stadiumit. /newsport/
