Ish-lojtari i Kombëtares, Rudi Vata, është shprehur se aktivizimi i 3 lojtarëve debutues titullar në një ndeshje delikate si ajo ndaj Kazakistanit, nuk është e duhura. I ftuar në “Ëndërr Kuqezi” në Rtsh, Vata është shprehur se në Kombëtare nuk ka një strategji dhe nuk dihet për çfarë luajnë.
“Prurjet e reja? Unë mendoj se këto janë të rëndësishme, sigurisht që duhet analizuar situata tani. Janë lojtarë që kanë bërë shumë mirë me ekipin e 21-vjeçarëve ku është Alban Bushi.
Është shumë mirë nëse iu japim mbështetje. Sot është një ndeshje delikate, nuk mund të aktivizosh 3 debutues menjëherë. Nëse ka një strategji, pasi nuk e dimë për çfarë luajmë dhe se cilat janë objektivat e kësaj Kombëtare.
Ky grup është nga grupet më të dobëta në Ligën e Kombeve, të gjitha skuadrat janë poshtë nesh. Toka jonë prodhon më shumë talente se Kazakistani. Ne nuk kemi identifikuar një lojtar goli.
Ne duhet të fokusohemi në një sulmues të mirëfilltë. Broja mund të bëjë mirë. Ne duhet të investojmë në një lojtar që ec para dhe mendoj se një nga ta është Broja. Ne duhet të zbulojmë sa më shumë talente.
Deklarata e Dukës për Hysajn? E shikoj si të paarsyeshme. Nëse do isha unë, do e merrja në telefon dhe do i thoja si guxon ta bëjë këtë në një radio. Nëse do isha si Hysaj, Duka sot do dilte të më kërkonte falje publike. Është e rëndë që një amator të fyejë një prefesionist”, u shpreh Vata.
