Kompania “Eurosamop” ka gjetur sot akordin me Bashkinë e qytetit të Huelva për të blerë aksionet e klubit më të vjetër spanjoll, Rekreativo Huelva, për vetëm 1 euro.
Kushti i vetëm që Bashkia duhet të plotësojë është që klubi në fjalë, i krijuar në vitin 1889, të mos ketë asnjë lloj detyrimi ndaj palëve të treta.
Bashkia ka paguar borxhe prej 7,6 milionë eurosh në vitin e fundit, të trashëguara në vite dhe që kishin bërë klubin andaluzian të zhytej deri në rënien në kategorinë e tretë spanjolle.
Ndërkohë, në javët e ardhshme do të paguhen edhe detyrimet e tjera të mbetura dhe nëpërmjet pagesës së vetëm 1 euro, “Eurosamop” do të kontrollojë 75% të aksioneve të klubit dhe të marrë kësisoj të gjitha vendimet rreth tij.
Edhe pse është klubi më i vjetër spanjoll dhe i pari që ka mundur të fitojë kundër një rivali portugez, suksesi më i madh në historinë e Rekreativo Huelva është pjesëmarrja në finalen e Kupës së Mbretit në vitin 2003, kur u mund 3-0 nga Majorka. /vipsport/
