Opinion nga Gjergj KOLA
Nëse Vllaznia ka dështuar edhe në kupë, sigurisht që një pjesë të rëndësishme të fajit kanë edhe lojtarët e ardhur në merkaton e janarit. Kuptohet që ata nuk janë fajtorët e vetëm por ndoshta më të rëndësishmit. Një përfundim I tillë vjen ngaqë ato 5 lojtarë të ardhur kanë hyrë menjëherë në formacion dhe kjo do të thotë se pas janarit, ka ndryshuar gjysma e skuadrës. Të tjerët janë po ato. Belisha, Smajli, Gocaj e Popoviç janë thuajse në të njëjtin nivel si në fazën e parë. I vetmi që ka pësuar rritje të dukshme është Hajdari I cili është lojtari më në formë I Vllaznisë. Po ato që erdhën? Kraja ka krijuar njëfarë stabiliteti në mbrojtje por në dy ndeshjet e fundit, ka shfaqur pasiguri. Më të dukshme ato kanë qenë tek mbrojtësi tjetër I qendrës, kroati Vuk që sidomos ndaj Kastriotit ishte përgjegjës për pësimin e disa golave. Edhe ndaj Flamurtarit tregoi pasiguri të theksuara. Në mesfushë Moreno ndonëse thuhej se ka përvojë të madhe me kombëtaren e Andorës, po tregon shumë dobësi. Dy zëvendësimet e tij në ndeshjet e fundit pas 20 apo 30 minutash, tregojnë se nuk kemi të bëjmë me lojtarin që do ta nxirrte nga situata Vllazninë me përvojën e tij. Po ashtu, Brnoviç ende nuk e ka mbyllur një ndeshje të plotë dhe nuk po bën diferencë në fushë me kënd. Problemet fizike vazhdojnë të jenë presente tek ai. Në sulm ndërkohë Jabllan duket se përpiqet shumë por është I pafuqishëm. Nuk ka mbështetjen e duhur por edhe vetë nuk ka aftësitë për ta shpëtuar Vllazninë. Në kushte të tilla, nëse skuadra shkodrane sot ka dalë jashtë objektivave të veta, një pjesë të konsiderueshme të fajit kanë edhe këta lojtarë të ardhur në merkaton e janarit.
