Ish-mesfushori i Vllaznisë, kampion me këtë skuadër, por edhe me ekipin e Elbasanit, Safet Osja, ka folur për situatën momentale të ekipit shkodran.
Sipas tij, Vllaznia ka një punë të madhe deri në fund të sezonit për të mbetur mes skuadrave më të mira të Superiores. Për ish-mesfushorin, skuadra duhet të bëjë mirë detyrat në shtëpinë e vet.
“Situata duhet të shikohet me optimizëm, por realisht Vllaznia po vuan fillimin e sezonit dhe më konkretisht pjesën e parë të tij.
Nuk ndodhemi aspak në kushte optimale, pavarësisht se ndryshimi i skuadrës nga ajo e pjesës së parë të sezonit është i dukshëm.
Ekipi duhet që të përqendrohet në çdo takim për të marrë maksimumin. Momentalisht, përveç skuadrës së Lushnjës, që për mendimin tim është e rënë, Vllaznia ka edhe një skuadër prapa.
Ekipi nuk duhet që të shikojë nga ndjekësi më i afërt nga poshtë, por të shkojë mundësinë të kalojë ndonjë kundërshtar që ndodhet më lart në renditje.
Unë kam besim te këta lojtarë, të cilët mund ta realizojnë këtë objektiv minimal që ka Vllaznia e këtij edicioni”, u shpreh fillimisht Osja.
ALEANCAT – Asnjë nga specialistët shkodranë, por edhe drejtuesit teknik të Vllaznisë, nuk e shikojnë Teutën si skuadrën më të rrezikuar për të rënë nga kategoria, pavarësisht se “djemtë e detit” ndodhen pas ekipit të drejtuar nga Ernest Gjoka.
I pyetur për aleancat, por edhe për skuadrat që mund të rrezikojnë përveç Vllaznisë e Teutës, Safet Osja përgjigjet: “Aleancat kanë qenë në çdo kohë, në çdo sezon, ndaj nuk do të mungojnë as këtë herë.
Aleancat dëmtojnë shumë, por unë jam i mendimit se skuadra shkodrane duhet të bëjë më të mirën, pikërisht atë që ka mundësi.
Nuk ka asnjë diskutim që aleancat do të preken edhe në këtë sezon, por shpresoj që të mos të na dëmtojnë.
Sa i përket betejës për mbijetesë, dua të them se përveç Teutës e Vllaznisë edhe Kamza mund të përfshihet në listën e skuadrave që mund të rrezikojnë.
Teutën e shikoj se mund t’i shpëtojë kësaj vorbulle për vetë faktin se Vllaznia e ka ndeshjen direkte me atë në Durrës.
Statistikat dhe faktet nuk i kanë favorizuar asnjëherë shkodranët. Por, Vllaznia ka favore, pasi ka më shumë takime në fushën e vet.
Nëse tregohet e saktë në fushën e vet, atëherë Vllaznia do të jetë e shpëtuar. Gjithsesi, mendimi im është se kjo skuadër do të vuajë deri në fund”, vijoi Osja.
SKËNDERBEU – Në fund të fjalës së tij, ish-mesfushori Safet Osja u shpreh edhe për takimin me Skënderbeun.
Ai ka vlerë- suar si tepër të rëndësishëm marrjen e fitores në këtë përballje. “Ndaj Skënderbeut do të jetë një nga takimet më të vështira për Vllazninë në “Loro Boriçi”.
Këto vështirësi shtohen edhe për faktin se ekipi ka disa mungesa. Por, lojtarët tani duhet të japin maksimumin e tyre dhe nuk duhet të shikojnë se cilin kundërshtarë kanë përballë.
Ato të bëjnë më të mirën që të fitojnë çdo takim në fushën e tyre. Nuk falet asnjë hap fals, pasi çdo pikë në fund mund të rezultojë fatale ose fatlume.
Prandaj, Vllaznia, sidomos në shtë- pi, duhet të luajë gjithçka për gjithçka”, deklaroi ish-kampioni kuqeblu, Safet Osja./panorama-sport/
