Skuadra e Viener Nojshtad bëhet gati të fillojë pjesën e dytë të sezonit pa Hamdi Salihin.
Atij i duhen edhe disa javë kohë për të arritur në gjendjen më të mirë fizike dhe për të dhënë kontributin e tij të zakonshëm në radhët e skuadrës që kërkon ngjitjen në elitën e kampionatit austriak.
Futbollisti ka shënuar 15 gola në pjesën e parë të sezonit duke ndihmuar klubin të mbajë vendin e dytë në klasifikim dhe shihet si një nga arsyet kryesore të suksesit të Nojshtad në këtë edicion.
Ai u operua në dhjetor për shkak të një hernie dhe ka disa ditë që është kthyer më në fund në stërvitje me ekipin, por duke zhvilluar një program individual për të gjetur formën më të mirë fizike, pasi nuk ka zhvilluar fazën përgatitore si pjesa tjetër e grupit.
Por trajneri Roman Mahlish nuk shqetësohet që Salihi nuk është në gjendje të luajë një ndeshje të plotë dhe nuk është çudi të fillojë ta aktivizojë bomberin shqiptar për disa minuta në çdo takim.
“Ai nuk është ende në 100%, por po stërvitet përsëri. Mendoj se do të jetë shpejt gati.
Nëse e njihni Hamdiun, e dini që atij nuk i nevojitet të jetë 90 minuta në fushë”, tha trajneri, duke bërë të qartë se bomberi mund të tregonte aftësitë e tij para portës në çdo rast që i shfaqej. /vipsport/
