Tronditet Bajerni i Mynihut. Kur gjërat dukeshin se po shkonin shumë mirë për ekipin e Flikut, kanë ardhur dy lajme aspak të këndshme në harkun kohor të pak ditëve. Fillimisht, humbja Hofenhajmin, e cila ishte e para pas 23 ndeshjeve dhe tani dëmtimi i sulmuesi Sane.
Ai doli nga fusha e lojës me dhimbje dhe u mendua se bëhej fjalë për një dëmtim muskulor. Ditën e djeshme, skuadra e Bajernit përmes një komunikate ka njoftuar se Sane është ekzaminuar me probleme në gju dhe do t’i duhen disa ditë pushim për t’u rikthyer sërish në stërvitje.
Sipas klubit, ai humbet duelin e mbrëmjes së sotme në Superkupën e Gjermanisë, por edhe sfidën e ardhshme në kampionatin gjerman kundër Hertës së Berlinit. Mediat raportojnë se Sane do të qëndrojë jashtë fushave të lojës për 3-4 javë dhe do të rikthehet vetëm pas ndeshjeve të kombëtares gjermane. Vetë trajneri Flik e konfirmoi diçka të tillë. “Shpresoj që ta kemi pas ndalesës së kombëtareve. Ta lëmë të qetë që të rikuperohet tani”, ka thënë trajneri i Bajernit.
TENTOHET DEPAJ
Kur kanë mbetur edhe pak ditë nga fundi i merkatos, në listën e dëshirave të Bajernit të Mynihut është shtuar sulmuesi holandez, Memfis Depaj. Duke qenë se bavarezët po kërkojnë një zëvendësues të Robert Levandovskit dhe një futbollist që mund të mbulojë disa role në repartin e avancuar, emri ideal është Depaj.
Skuadra e Lionit ka vendosur që ta largojë duke qenë se ai është në vitin e fundit të kontratës, francezët dëshirojnë që të përfitojnë diçka nga shitja e tij dhe kanë ulur ndjeshëm kërkesat. Depaj kushton vetëm 12 milionë euro dhe Bajerni sigurisht që po e mendon seriozisht diçka të tillë.
Nuk duhet të harrojmë që sulmuesi holandez ka qenë i lidhur prej disa ditësh edhe me një kalim të mundshëm te Barcelona, por duket se katalanasit kanë vështirësi ekonomike dhe përpara se të bëjnë blerje, duhet që të shesin disa lojtarë. Opsioni i Bajernit është më i mundshëm, por deri në ditën e fundit të merkatos mund të ndodhin shumë ndryshime. Depaj do të bënte të lumtur trajnerin Flik nëse do të transferohej në Gjermani.
