Pak ditë më parë ka shijuar titullin kampion bote për 23 vjeçarët të ish-sportistit të tij Jurgen Uldedaj. E ka stërvitur për disa vite me rradhë para se ai të kalonte në Gjermani, megjithatë Sead Bushati ka edhe ai pjesën e tij të suksesit në këtë titull shumë të rëndësishëm.
Në këto momente, shkodrani që është trajner i ekipit të boksit të Tiranës, kuptohet që ndjehet krenar për punën e bërë dhe talentin që zotëron si trajner. Por gjithsesi, ai ka një vlerësim maksimal për një trajner tjetër. Atë që e ka stërvitur si sportist.
Bëhet fjalë për Zef Gjonin, trajnerin e mirënjohur të Vllaznisë dhe të ekipit kombëtar. Ka mjaftuar një shkrim i pak ditëve më parë në “Shkodra Sport” për këtë trajner që ka festuar 45 trofetë e fituara me Vllazninë, që ka sjellë një koment shumë interesant të Sead Bushatit.
“Profesor Zefi është dhe do të mbetet i paarritshëm si trajner në sportin e boksit shqiptar! Si nxënës i tij mund të them se nuk ka trajner në botë që mund të krahasohet me përkushtimin e tij në stërvitje!
I janë ofruar shumë punë të ndryshme që mund të ishin shumë me leverdi nga ana financiare, por ai ka preferuar të qëndrojë vetëm pranë sportit të boksit. Të flasësh për të do duhen ditë të tëra. I uroj shëndet dhe respekte…”
© shkodrasport.com
