Emërimi i befasishëm i trajnerit maqedonas, Goce Sedloski, te Vllaznia, fillimisht u prit me skepticizëm nga specialistët e futbollit në Shkodër dhe për më tepër tifozët kuqeblu, të cilët ishin njohur nga klubi se në krye të pankinës do të ishte Auron Miloti.
Në debutimin e Sedloskit ndaj Erzenit, skuadra shkodrane u rikthye te fitorja dhe u duk tërësisht e tjetërsuar nga takimet e mëparshme.
Në fushë ishte një skuadër që tregoi grintë dhe dëshirë më të madhe. Por, kjo nuk është se ka ardhur kaq rastësisht dhe një meritë për ndryshimin e atmosferës e ka pikërisht trajneri Sedloski.
Pas fitores së parë u tregua modest në deklaratën e tij, duke ia dedikuar meritën tërësisht lojtarëve për mënyrën se si e kanë ndjekur në pak ditë stërvitje.
Por çfarë ndryshoi në pak ditë dhe si i motivoi futbollistët maqedonasi i ardhur pas aventurës te Shkupi…?
KËRKESAT Gjëja e parë që ka kërkuar Sedloski nga ekipi ka qenë disiplina në stërvitje. Trajneri kërkon rregull në çdo aspekt, madje është i fiksuar me detajet më të vogla.
Së pari ai nuk kërkon shkelmime topash pa lidhje gjatë stërvitjes apo biseda mes lojtarëve që s’kanë lidhje me punën. Sedloski ka kërkuar vëmendje tek ajo që ai shpjegon për procesin e punës dhe kjo është shoqëruar edhe me gatishmërinë e të gjithë stafit dhe lojtarëve në gjithë ditët e përgatitjeve të deritanishme.
“Panorama Sport” zbulon se maqedonasi nuk i ka mbyllur këtu kërkesat, pasi ka pasur gjëra specifike jo vetëm ndaj lojtarëve, por edhe drejtuesve të klubit. Ai mësohet se i ka kërkuar atyre që para çdo ndeshjeje të ketë një tryezë plot në dhomat e zhveshjes.
Pra, përveç frutave të ndryshme dhe lëngjeve, ai ka kërkuar që në dhomat e zhveshjes të ketë gjithashtu fruta të thata dhe kafe. Këto maqedonasi ua ka kërkuar lojtarëve t’i konsumojnë qoftë para ndeshjes, ashtu edhe në pushimin prej 15 minutave.
Ndërsa sa i përket fundit të takimit, trajneri ka kërkuar nga klubi që të vendosë në dispozicion pica në momentin që ekipi futet në dhomat e zhveshjes. Këto mund të duken disa detaje të vogla, që sigurisht përdoren edhe në klubet më të njohura në Europë, por Sedloski ka kërkuar që të jenë të pranishme.
Ndoshta një risi për Vllazninë kjo, por që krijojnë një frymë tjetër, ndërsa trajneri kërkon më shumë seriozitet dhe përgjegjësi. Mësohet se në analizën para ndeshjes dhe në pushim të saj, maqedonasi ka urdhëruar që me përjashtim të stafit dhe lojtarëve, të mos jetë askush tjetër nga klubi i pranishëm.
Këtë ua ka kërkuar me insistim drejtuesve më të lartë dhe sigurisht që duhet të respektohet nga ana e tyre. Eksperienca që trajneri maqedonas ka edhe në klube jashtë Shqipërisë është një arsye më shumë që presidenti Xhaferi i besoi stolin e Vllaznisë.
