Nga Keita, i ardhur me kosto zero dhe i shitur për 30 milionë euro, te Thomas Strakosha, që tanimë konsiderohet si një nga portierët më të mirë të Serie A.
Për pak nuk ndodhi edhe mrekullia financiare me De Vrij, por është një mrekulli e plotë ajo e Milinovic-Savic, që ka dhjetë-fishuar vlerën në merkato.
Gjithsesi, gjithçka nisi me Klose. Ja përse shqiptari Igli Tare është arma më e fortë e presidentit të Lazio, Claudio Lotitto.
Zbulimi – E “peshkoi” kur ishte 16 vjeç. Igli Tare, për të blerë Keita i hipi avionit dhe shkoi personalisht në Barcelonë.
Atje “u dashurua” me futbollistin e shpejtë dhe teknik, që pak vite më pas, do ta shiste 30 milionë euro.
Një futbollist spektakolar që luajti me Lazio, por mbi të gjitha një operacion merkatoje i shkëlqyer.
Falë babait – Miqësia me Fotaq Strakosha ka qenë vendimtare. Sigurisht që kjo e ka ndihmuar për të sjellë Thomas në kryeqytetin italian.
Ishte viti 2012, kur talenti i portës u la i lirë nga Panionios në Athinë.
Në gjurmët e tij ishte vënë edhe Walter Sabatini i Roma, por Tare fitoi derbin dhe sot portën e Lazio e mbron një nga portierët më të mirë të kampionatit italian me koston e blerjes, zero euro.
Mrekulli përgjysmë – Padyshim që ka qenë një nga goditjet më të mira të Igli Tare.
Stefan de Vrij erdhi për 8.5 milionë euro dhe sot vlen të paktën 30 milionë euro, por në qershor do të largohet me parametër zero, sepse nuk rinovoi kontratën me klubin.
Mrekullia e realizuar – Blerja më e mirë e Igli Tare, të paktën duke u bazuar te shifrat ka qenë Milinkovic-Savic.
Drejtori sportiv i Lazio e zgjodhi personalisht futbollistin kur ishte pjesë e Genk duke fituar duelin me Fiorentina sepse pagoi 14 milionë euro, një shifër që u quajt e lartë për kohën, por aktualisht 22-vjeçari vlen gati dhjetë-fishin e shumës që u shpenzua për të. Kaq mjafton…
Kosto zero – 63 gola në 171 ndeshje, pa shpenzuar asnjë qindarkë. Këto janë shifrat e transferimit të Klose.
Pas përvojës me Bayern, ai ishte shumë pranë Romës, por jo, Miro u konfirmua si gjigant me fanellën e Lazio sepse ishte Tare ai që e bindi të zgjidhte ngjyrat bardhekaltër, duke lumturuar tifozët.
