Emri i tij padyshim që ka qenë shumë i dashur për të gjithë shkodranët dhe jo vetëm. Selami Dani me lojën dhe golat e tij u pat shndërruar në një faktor të rëndësishëm në sukseset e Vllaznisë së viteve ’60. Me golin e tij i dha asaj të parën Kupë të Republikës në vitin 1965 dhe ka luajtur me sukses deri në vitin 1972 kur vendosi të varë këpucët në gozhdë.
Ka vijuar edhe për vite më pas që të bëjë rolin e trajnerit të moshave dhe gjithmonë ka lënë një respekt të madh tek të gjithë. Jo më kot, kur anëtarëve të Këshillit Bashkiak kohë më parë iu propozua dhënia e titullit “Mirënjohja e Bashkisë” për Selami Danin, të gjithë kanë votuar unanimisht pro.
Ky titull iu dorëzua pasditen e djeshme në aktivitetin e organizuar në Bashkinë Shkodër dhe ka qenë anëtari i Këshillit Maxhid Cungu ai që ia ka dorëzuar. Vetë profesor Selamia është parë tejet i emocionuar për këtë titull të akorduar dhe mes fjalëve që i dilnin mes drithërimash nga zemra e tij, është shprehur:
“Medaljet apo titujt që kam marrë më parë nga Federata sigurisht që kanë patur vlerën e vet, por nuk janë asgja karshi këtij nderimi që mu bë nga Bashkisë Shkodër. Jam shumë i emocionuar. E kam prit këtë ditë në fakt sepse nuk kisha një vlerësim nga Shkodra ime, ndonëse kisha dhanë një kontribut kaq të madh në vite për të.
Vlerësime të tilla në fakt është mirë që të bahen sa njerëzit të jeën gjallë sepse ka pak rëndësi kur ta japin atëherë kur nuk e shijon ai personi që nderohet”.
© shkodrasport.com
