Senad Lekaj është njëri nga futbollistët e Vllaznisë në futsall, i cili realisht duhet veçuar, pasi po spikat së tepërmi në fushën e lojës me atë që po jep.
Edhe në ndeshjen e fundit të luajtur në kryeqytet ndaj ekipit Eagles Land, 33-vjeçari shkodran bëri maksimumin për skuadrën e tij, duke qenë ndër futbollistët më të mirë në fushën e lojës, teksa shënoi edhe një dopietë.
Ai jo vetëm ka bërë një paraqitje tepër pozitive me Vllazninë e futsallës, por ka qenë edhe autor i katër golave për kuqeblutë në ndeshjet e luajtura deri më tani, duke treguar një klas të lartë në këtë drejtim.
Në fakt, duket se edhe pse në moshën 33-vjeçare, Senad Lekaj nuk ka ndërmend të heqë dorë kollaj nga futbolli i luajtur. Realisht, pasioni për këtë sport vazhdon të jetë i madh brenda tij dhe ai vijon të luajë futboll sa herë që i jepet mundësia, jo në nivelin amator, por i angazhuar maksimalisht si pjesë e ekipit të futsallës së Vllaznisë.
Padyshim, deri më tani, ai ka qenë protagonisti kryesor i kuqebluve me lojën dhe golat e shënuar, teksa ka arritur të shënojë katër të tillë, por edhe të dhurojë edhe tre assiste.
Maringlen ZHIVANI
