Nga Endri ÇINARI
Si asnjëherë më parë në historinë e futbollit dhe atij ballkanas ka 4 ekipe shqiptare kampione në rajon. Duke nisur nga Egnatia që triumfoi në Superioren tonë e po ashtu Ballkani që triumfoi në kampionatin kosovar. Por gjithashtu historinë bëri edhe Deçiçi, ekipi nga Tuzi që fitoi kampionatin në Malin e Zi. Për ta mbyllur “pokerin” shqiptar është edhe fitorja e kampionatit nga Struga në Maqedoninë e Veriut.
Një histori që vështirë se mund të përsëritet dhe të ketë precedentë ku 4 ekipe shqiptare të jenë kampione njëkohësisht. Por ky edicion ka qenë i suksesshëm edhe për futbollistët shqiptarë në mbarë Europën. Suksesin më të madh e ka arritur kapiteni i kombëtares shqiptare, Berat Gjimshiti. Që fitoi Europa League me ekipin e Atalantas. Më pas nuk ngelet as Kristijan Asllani.
Me mesfushorin kuqezi që arriti të shpallej kampion i Serie A me Interin. Pavarësisht se nuk luan me kombëtaren tonë, Granit Xhaka ishte protagonist absolut me Leverkusen. Duke fituar kampionatin dhe kupën e Gjermanisë me “aspirinat”. Por nuk ndalen me kaq kampionët kuqezi, në Çeki me Spartën e Pragës u shpallën kampionë të vendit Qazim Laçi dhe Indrit Tuci.
Po ashtu triumfator me Qarabag në Azerbajxhan ishte edhe Redon Xhixha në fundin e këtij edicioni. Një dyshe kampionësh shqiptarë si: Hoxha dhe Ademi kishte edhe në Kroaci. Ku si sulmuesi i Shqipërisë ashtu edhe mesfushori i Maqedonisë së Veriut ishin pjesë e suksesit të Dinamo Zagreb. Besiktas nuk ishte fitues i kampionatit, por i kupës së Turqisë.
Me ekipin e “shqiponjave” protagonistë ishin edhe dy mesfushorët shqiptarë. Ernest Muçi dhe Milot Rashica, të cilët janë protagonistë absolutë për ekipin e njohur turk. Një sasi të tillë kampionësh shqiptarë në futbollin europian vështirë se ka pasur ndonjëherë. E kjo me patjetër mund të jetë një ogur pozitiv për kombëtaren shqiptare në prag të Euro 2024./www.shkodrasport.com/
