Ish-futbollisiti dhe ish-administratori i Vllaznisë, Kujtim Shaba ka analizuar së fundmi situatën tek kuqeblutë. Sipas Shabes të gjithë kanë përgjegjësitë e tyre e në veçanti drejtuesit e skuadrës.
Ai thekson se presidenca nuk duhej të ishte kaq tolerante për situatën e krijuar tek shkodranët. Po ashtu ish-mbrojtësi thekson se sezoni do jetë i dështuar nëse ekipi nuk kualifikohet në kupat e Europës.
Shaba tha: “Pamë një Vllazni apatike në ndeshjen e fundit kundër Bylis. Pak a shumë siç e kemi parë shpesh herë në këtë periudhën e fundit. Një lojë të përgjumur, pa ritëm, pa grintë dhe pa dëshirë. Shumë pasime horizontale, pa ide për të dalur në sulm. Një Vllazni akademike mund ta quaj, që me një lojë të tillë nuk garanton aspak.
Prisja ndoshta një “shkëndijë” tjetër pas largimit të Mire Joses. Por në fushën e lojës nuk e pashë diçka të tillë.
Përgjegjës për situatën ? Të gjithë pa përjashtim, nga i pari tek i fundit duhet të marrin fajet e tyre. Por unë theksoj se presidenca ka “mëkatet” e veta. Sipas meje është treguar shumë e butë dhe dashamirëse. Duhet të merrte masa më të ashpëra që situata të mos shkonte këtu. Duke parë që ekipi është më i mirë investuari dhe më i mirë paguari në Superiore.
Sezoni i Vllaznisë ? Do jetë totalisht dështim nëse nuk kualifikohet në Europë. Jo vetëm për aspektin sportiv, por edhe atë ekonomik. Ku klubi do merrte një goditje të rëndë për financat e sezonit të ardhshëm nëse nuk do jetë në kupat e Europës në fund të edicionit”.
Endri ÇINARI
