Shefi i sektorit të garave në FSHF, Lysien Nurishmi, në një intervistë për “Supersport”, shkon edhe më tej, duke bërë edhe trajnerin.
Ai thekson se çdo skuadër ka marrë atë që meriton, sipas organikës dhe asaj çfarë ka dhënë në fushë. E ka një shpjegim edhe pse skuadrat e mëdha luanin aq dobët javët e fundit:
“Çdo skuadër ka marrë atë që meritoi në kampionatin e fundit. Mori atë që dha në fushë. Nuk pati influenca të jashtme. Pati rezultate të ekipeve sipas organikës së tyre dhe nuk pati kontestime.
Ishte një nga sezonet më të qetë, sidomos nga ana disiplinore, sidomos në Superiore. Kemi fitore të skuadrave udhëtuese dhe kjo tregon qartë se ka qenë një garë e drejtë.
Tolerimet? Në fundin e kampionatit ka skuadra që janë jashtë objektivave dhe shumica e trajnerëve hedhin në fushë lojtarët e rinj, prandaj dhe ka pasur rezultate, që nga specialistët konsiderohen surprizë, por nuk ka pasur tolerime.
Pjesa kryesore e organizimit për sezonin e ri është ajo e licencimit të klubeve, infrastruktura.
Sektori përkatës ka kryer inspektime në stadiumet me probleme. Për shembull, Kastrioti ka probleme me tribunat dhe sektori i licencimit ka lënë detyra për drejtuesit e tij, ashtu si dhe për disa stadiume të tjera.
Për Kategorinë Superiore, kjo skemë është e duhura, i ka qëndruar kohës, si nga ana financiare, edhe për garën. Është skema më e mirë.
Për kategorinë e Parë nuk ka ndryshime në strukturë, por ndoshta në skemën e kampionatit, pasi ka një propozim, por të shohim”, – ka thënë mes të tjerash shefi i garave në FSHF, Lysien Nurishmi.
