Dita e djeshme ka qenë shumë intensive për punonjësit e pallatit të sportit “Qazim Dervishi”. Ata janë marrë me rregullimet e fundit të ambjentit në mënyrë që gjithçka të ishte gati për takimin e sotëm. Përpos kësaj, ka mbërritur edhe tabela e re elektronike si dhe është kompletuar edhe njëra tribunë me stolat e duhur. Për shefin e klubit shumësportësh Vllaznia Mark Kroqi, tashmë çdo gjë është gati për ndeshjen por ai nuk ka “harruar” të lërë disa porosi për tifozët shkodranë. “Mendoj se çdo gjë është gati. I gjithë personeli i klubit Vllaznia është në gatishmëri për këtë takim të shumëpritur dhe besoj që nga ana organizative të mos mungojë asgjë. Dua t’u kujtoj diçka tifozëve shkodranë. Liga Ballkanike ka rregulla shumë të forta për tifozët sepse ndalohet hyrja e e tyre me cigare, ndalohet hyrja me mjete të forta, madje nuk lejohen as çakmakët dhe as monedhat e hekurit. Për këtë arsye, besoj se ata do të jenë të vetëdijshëm për këto masa dhe do t’i zbatojmë në mënyrë që gjithçka të shkojë mbarë për këtë takim”- ka thënë ai.
Gjergj KOLA
