Numri 1 i klubit shumësportësh Vllaznia, Gëzim Mema ka hedhur poshtë çdo dilemë që ka ekzistuar për zhvillimin apo jo të Memorialit “Vllaznia 2012” në boks. Në një prononcim të tij për gazetën online www.shkodrasport.com, ai ka theksuar se pret nga Bashkia Shkodër garancinë për përballimin e këtij aktiviteti nga ana financiare, ashtu siç ka bërë edhe vitet e tjera.Marsi po afron dhe bashkë me të edhe Memoriali ndërkombëtar i boksit “Vllaznia 2012”. Deri tani kanë konfirmuar pjesmarrjen e tyre plot 15 shtete, çka tregon se do kemi një pjesmarrje shumë të madhe, mes të cilëve edhe kampiona bote dhe kampionë olimpike. Prej shumë kohësh, dilema e madhe ka qenë mbulimi i anës financiare për zhvillimin e këtij aktiviteti të rëndësishëm. Sipas shefit të klubit shumësportësh Vllaznia, Gëzim Mema, nga ana e klubit që ai drejton i është dërguar shkresa përkatëse Bashkisë Shkodër për akordimin e një fondi të posaçëm për këtë aktivitet dhe pritet që ky institucion ta marrë në shqyrtim atë dhe të marrë përsipër zhvillimin e tij. “Prej kohësh, i kemi dërguar Bashkisë Shkodër shkresën përkatëse me kërkesën për fondin prej 5 milionë lekësh të vjetra për përballimin e këtij Memoriali nga ana financiare. Madje, pas kësaj kërkese, kemi bërë edhe një shkresë tjetër për të kërkuar një shtesë fondi ngaqë po shohim se sivjet do kemi një pjesmarrje shumë të madhe sportistësh nga e gjithë bota. Unë shpresoj se ashtu si vitet e tjera, edhe këtë vit, Memoriali do zhvillohet. Shpresojmë që të mos ketë reduktime fondi sepse pastaj do viheshim në pozitë megjithatë unë besoj tek Bashkia se ka për ta ndihmuar sportin e boksit këtë herë, për më tepër që ky është i vetmi aktivitet ndërkombëtar sportiv që zhvilojmë në Shkodër”-ka thënë ai. Me nje pjesmarrje kaq te gjere, sigurisht qe duhen shume me teper fonde por per shefin Mema, e rendesishme eshte qe Memoriali “Vllaznia 2012” do të zhvillohet dhe për këtë nuk ka as më të voglin dyshim. Memoriali do bëhet por kuptohet që nëse nuk do gjenden fondet e duhura, organizatorët do jenë të detyruar t’u kërkojnë gjysmën së ekipeve pjesmarrëse, të mos vijnë.
www.shkodrasport.com
