Caktimi i një date të shpejtë për zhvillimin e Asamblesë Zgjedhore në FSHF ka qenë disi i papritur për opinionin e gjerë sportiv në Shqipëri. Por duket se gjithçka ka qenë e mirëllogaritur për shkak të një prapaskene mjaft interesante që ka lidhje me një tjetër vendim që pritet të dalë nga zyrat e UEFA-s në dëm të futbollit shqiptar, më saktësisht ndaj një prej klubeve të Superiores.Drejtori i “Vipsport.al”, Fation Shehu, i ftuar në studion e “FAX NEWS” për të folur rreth zgjedhjeve në FSHF, ka bërë të ditur se pritet një dënim shembullor për një klub shqiptar nga UEFA sa i përket manipulimit të rezultateve sportive.
Nga burime pranë UEFA-s është mësuar se ky vendim pritet të dalë në një periudhë shumë të afërt, para fundit të muajit shkurt. Ndaj me shpresën që ky vendim të mos dalë gjatë fushatës zgjedhore, drejtuesit e FSHF-së vendosën që të afronin sa lejonte juridikisht Statuti datën e Asamblesë Zgjedhore, në mënyrë që të evitonin përplasjen e kësaj ngjarje më atë të masës ndëshkimore të UEFA-s, që do të ngrinte shumë pikëpyetje mbi drejtimin aktual të institucionit të futbollit./vipsport/
