Shkodra është shquar gjithmonë si qyteti që nxjerr shumë talente futbolli. Ato ndër vite kanë furnizuar jo vetëm ekipin e Vllaznisë por edhe atë kombëtar ndërkohë që vitet e fundit, futbollistët shkodranë janë hapur edhe nëpër Botë.
Tek Akademia Vllaznia vazhdon të punohet mirë me elementin e ri. Padyshim që objektivi kryesor i drejtuesve dhe trajnerëve të saj, është evidentimi i elementit cilësor.
Një prej tyre që po spikat me paraqitjet e tij dhe që premton shumë për të ardhmen është Nebi Qokthi.
I datëlindjes 16 gusht 2006, ai është pjesë e ekipit U-13 të kësaj Akademie, me trajner Altin Xhahysën. Bjondi shtatëshkurtër spikat me mënyrën si luan, me teknikën e tij të lartë dhe zgjuarsinë në fushë.
Pak kohë më parë, ka qenë pjesmarrës në një turne në Spanjë nën drejtimin e trajnerit Edi Martini dhe Qokthi ka spikatur me paraqitjet e tij.
Duke shkruar për këtë personazh, na kujtohet ajo shprehja e pak kohëve më parë e trajnerit të Vllaznisë Ernest Gjoka kur thoshte: Futbollist nuk mund të bëhesh me zor”.
Në fakt, kjo është mëse e vërtetë. Djaloshi për të cilin po shkruajmë, nuk e dimë as i kujt është dhe as nga cila lagje apo fshat i Shkodrës është.
Ajo që dimë është se të gjithë flasin mirë për të. Se çfarë do të ndodhë në vijim, askush nuk mund ta thotë me siguri.
Ajo që ju sugjerojmë është ta mbani mend këtë emër. Brenda pak vitesh me siguri që do të dëgjojmë lajme të mira për Nebi Qokthin.
© shkodrasport.com
