Naxhi Shensoi e nisi rikthimin te Bylisi pikërisht me një fitore ndaj Vllaznisë në Ballsh 1-0. Dhe atëherë për Bylisin shënonte Filipe Souza që sot mungon në Shkodër. Por sfida e sotme do të jetë ndryshe dhe në Ballsh kanë marrë masat që të bëjnë më të mirën. Ballshiotët këtë sezon kanë treguar se janë një skuadër që dinë të marrin pikë apo fitojnë edhe në ndeshjet jashtë fushës së tyre.
Naxhi Shensoi kërkon nga skuadra që të vazhdojë me lojërat e bukura sigurisht, por nga ana tjetër lutet edhe për fat, për lojtarët sidomos, që sipas trajnerit të skuadrës nga Mallakastra, po bëjnë dhe po japin gjithçka që të ngrenë skuadrën dhe ta nxjerrin nga zona ku ndodhet.
Në prononcimin që ka dhënë para sfidës me Vllazninë, trajneri i mallakastriotëve ka pohuar:
“Po, ky pushim na shërben disi, sepse edhe djemtë kanë nevojë, dhe pse jo, edhe lojtarët që janë afruar bëhen në fundin e merkatos njësh me pjesën tjetër të ekipit. Kemi luajtur mirë, por e them, fati na ka penalizuar. Sot luajmë në Shkodër me një nga ekipet që bën futbollin ndoshta edhe më të bukur me qarkullim topi, por ne duhet që të kërkojnë pikët, sepse ato po na mungojnë ndoshta dhe me të padrejtë.
Në këto ndeshje dhe javë që kanë mbetur ne duhet të bëjmë jo 100, por 200 për qind dhe të arrijmë që të marrim pikët, e pse jo, të rikuperojmë edhe ato të lëna. Respekt për kundërshtarin që bën hapa para në futbollin shqiptar, kanë një fushë shumë të mirë, por edhe shkodranët jetojnë dhe e duan futbollin.
Por duhet që të na mirëkuptojnë dhe ne do të hyjmë në fushë që të tregojmë atë Bylisin që në futbollin shqiptar ka një imazh në rritje, por edhe ai prodhues talentesh, sepse po ta shohësh nga Ballshi po vazhdon ajo traditë e mirë që kemi nisur unë me presidentin Kapllanaj një dekadë më parë. Unë jam gjithmonë me faktin dhe realen, por sot duam edhe fatin me vete, sepse edhe Bylisi do pak atë “dorën e zotit” për ta çuar topin në rrjetë.
Shpresojmë që do t’ia dalim dhe kam besim se do të jetë futboll spektakolar duke kënaqur të pranishmit”, tha Naxhi Shensoi para sfidës me kuqeblutë, takim që starton në orën 15:00 në “Loro Boriçi”.
