Vllaznia në vite është shquar për portierë cilësorë. Një ndër to, i cili ka luajtur herët me skuadrën shkodrane, ka qenë edhe Sheuki Boshnjaku. Ai ka dhënë kontributin e tij me këtë ekip për disa vite me rradhë ndonëse vitet ’50 nuk i kanë dhënë atij mundësinë të fitonte ndonjë trofe me të. Sheuki Boshnjaku kishte lindur për t’u bërë sportist dhe për të tillë e mbante veten për atë që kishte dhënë për Vllazninë e Partizanin në futboll gjatë viteve 1951-1963 por edhe si atlet i mirë në ato vite, ku me pak stërvitje ai ishte i pakalueshëm në kërcimin trehapësh.
Përveç kësaj, Sheukia kishte ushqyer tek fëmijët dashurinë për sportin. Nëse Kujtimi nuk e pasoi babain e tij si portier, pasi u mor me atletikë, në garën e hedhjes së çekiçit, këtë e bëri djali tjetër i tij- Genci i cili luajti si portier, më parë me të rinjtë dhe pastaj me skuadrën e parë të Vllaznisë.
Të gjithë kujtojnë në portë një Sheuki që e mbushte atë me atë trupin e gjatë dhe të zhdërvjelltë, që jetonte me lojën duke drejtuar dhe udhëzuar shokët në lojë si një trajner i dytë. Ndër ndeshjet më të bukura të tij, padyshim që veçohet ajo në mes Punës dhe Dinamos së Shkodrës në vitin 1954 kur Shefkiu ishte një figurë e paharruar si dhe në takimet ndërkombëtare, sidomos në ndeshjen e tij të mrekullueshme kundër Buduçnostit në vitin 1957 kur ai ishte një protagonist i vërtetë për të ruajtur të paprekur, 0-0, rezultatin e ndeshjes. Po ashtu, ai ka bërë një figurë shumë të mirë edhe në takimin kundër Lodzit të Polonisë. Megjithatë nuk ka qenë e lehtë për të, të luante dhe të tregonte vlerat e tij. Xhaxhai i tij ka qenë i arratisur dhe për rrjedhojë, nuk shihej me sy të mirë nga drejtuesit e sportit. Pavarësisht kësaj, Shefkiu ia doli të luante me sukses. Për fat të keq, jeta e këtij portieri nuk ka qenë shumë e gjatë. Sheuki Boshnjaku është ndarë nga jeta në moshën 59 vjeçare por duke lënë prapa një emër të mirë në sport dhe jashtë tij.
Gjergj KOLA
