Nga Endri ÇINARI
Vllaznia U-14 mori një fitore prestigji ditën e shtunë, ku në kuadër të sezonit 2024-25 arritën të mposhtnin bashkëmoshatarët e Tiranës në shifrat 3-0. Kuqeblutë e vegjël e drejtuar nga Haris Dalipi, arritën të ishin imponues ndaj kryeqytetasve, duke dominuar nga fillimi në fund. E në përfundim të 90 minutave duke marrë 3 pikët e plota.
Protagonist absolut dhe kryesor në “klasiken” e 14-vjeçarëve ishte Maldis Boshnjaku. Sulmuesi i Vllaznisë arriti që të zhbllokonte shifrat me një gol mjaft të bukur që erdhi pas një aksioni të gjatë në minutën e 12-të. Por numri 9-të i kuqebluve nuk do ndalej me kaq në këtë duel. Ku ishte edhe asistues i golit të dytë të ndeshjes përballë bardhebluve, shkruan shkodrasport.com
Boshnjaku, një futbollist i ditëlindjes 2011 është një nga elementët shumë premtues tek akademia Vllaznia. Me lojën dhe golat e tij ai ka rënë në sy gjatë gjithë sezonit tek skuadra U-14 e kuqebluve. Ku po spikat si një sulmues modern, i cili përveç golave, cilësohet edhe si një lojtar mjaft teknik. Ku shpesh herë është parë edhe në rolin e asistuesit për shokët e tij të skuadrës.
Sulmuesi shkodran vijon kësisoj me performanca e mira që nga sezoni i kaluar, ku me 13-vjeçarët arriti të shënonte 10 gola në kampionat. E ndërsa dha disa herë kontributin edhe me ekipin e 14-vjeçarëve, pavarësisht moshës më të vogël. Një element që premton shumë për të ardhmen, me Vllazninë që ka disa vite që nuk prodhon një sulmues tipik. E duket se një “bomber” i së ardhmes për 9 herë kampionët e vendit mund të jetë Boshnjaku, pavarësisht se rruga është ende e gjatë për djaloshin e ri.(www.shkodrasport.com)
